Այսօր Շենգավիթ վարչական շրջանի ընդհանուր իրավասության դատարանում քաղաքացիական ակտիվիստ Վարդգես Գասպարին նորից պառկեց դատարանի դահլիճում, իսկ դատավոր Նելլի Բաղդասարյանը նրան պատժեց՝ արգելելով մասնակցել նիստերին եւս 6 ժամ:
Գասպարիի փաստաբան Տիգրան Եգորյանը փորձում էր դատավորի գործողությունների հետ կապված առարկություն ներկայացնել, սակայն դատավորը նրան էլ թույլ չէր տալիս խոսել: Ավելին՝ սպառնաց, որ նրան կհեռացնի դատարանի դահլիճից: Եգորյանը բարկացավ. «Հարգելի՛ նախագահող, ինձ թվում է, ստեղ կա միայն մեկ անձ, ում պետք է հեռացնել նիստերի դահլիճից»:
Տիգրան Եգորյանը հայտարարեց, որ եթե Գասպարիին հեռացրել են նիստերի դահլիճից, իր վստահորդը չի տալիս իրենց լիազորություն առանց իր ներկայության պաշտպանել իր շահերը, ուստի ստիպված է նաեւ ինքը հեռանալ: Հեռանալու համար դատավորը նույնպես սանկցիա կիրառեց Եգորյանի նկատմամբ:
Մեր հարցին, թե ինչքա՞ն պետք է այսպես շարունակվեն դատական նիստերը՝ Տիգրան Եգորյանը պատասխանեց. «Դատավորի պահվածք չի սա, սա առհասարակ իրավաբանի պահվածք չի: Սա…ես չգիտեմ, սանձարձակ, քմահաճ եւ ոչ մի կերպ օրենքին ու իրավունքին չառնչվող մի կնոջ պահվածք է, որը տեղ չունի դատական համակարգում: Այս մարդուն ուղղակի պետք է այնպես հեռացնեն դատական համակարգից, որ դա համադրելի լինի ժողովրդի մեջ կիրառվող «դուրս շպրտել» եզրի հետ: Սա արդարադատություն չի, սա ուղղակի աբսուրդ է: Հնարավոր չի այսպիսի դատական նիստեր անցկացնելը: Սա դատական նիստ էլ չենք կարող անվանել՝ միջոցառում: Մեր իրավունքների իրացումը սահմանափակված է: Մենք իրավունք չունենք հայտարարություններ անելու, մեզ չի թույլատրվում առարկություններ անելու: Արդեն որերորդ դատական նիստն է՝ դատավորը չի էլ բարեհաճում մեր ինքնաբացարկի միջնորդությունը լսել: Կիրառած սանկցիաների հետ կապված չեն ներկայացվում իրավական հիմքերը: Անհասկանալի է՝ ոնց է պետք այս նիստերին մասնակցել, եթե դատավորը ցանկացած բառի կապակցությամբ ասում է՝ դուք պետք է դատավորի թույլտվությունն ունենաք, իսկ դատարանը արգելում է: Քրեական դատավարության ժամանակ այսպիսի ընթացակարգ չկա նախատեսված»:
Կարդացեք նաև
Մեր հարցին՝ այս դատավորը նման վերաբերմունք միայն այս գործի՞ շրջանակներում է դրսեւորում, թե՞ առհասարակ այսպիսին է՝ Տիգրան Եգորյանը պատասխանեց, որ լսել է՝ առհասարակ համարժեքության տեսակետից պրոբլեմային անձնավորություն է, իսկ այս նիստերին իր ողջ ներկապնակով դա դրսեւորվում է:
Հռիփսիմե ՋԵԲԵՋՅԱՆ
