Մարտի 8-ին՝ Կանանց իրավունքների միջազգային օրվա կապակցությամբ Հայաստանի «Ֆեմինիստ պլատֆորմի» միջոցառմանը միացել էին նաեւ «Հրադադար. մարդկային կորստի ցավը» հասարակական կազմակերպության անդամները:
Հասարակական կազմակերպության նախագահ Աղունիկ Ղուկասյանը նշեց, որ համարում է, որ կազմակերպված ակցիան բոլոր կանանց համար է. «Պարտադիր չէ, որ մեկս մյուսի Մարտի 8-ը շնորհավորենք կամ նվերներ ստանանք: Ինձ թվում է՝ կանանց միջազգային օրը կինը իրավունք ունի բարձրաձայնել իր ցավը: Քանի որ մենք զոհվածների մայրեր ենք, մենք այստեղ հավաքվել՝ մեր ցանկությունը արտահայտելու, որ սահմանում զոհեր չլինեն: Ուզում ենք, որ մինուճար տղաները չգնան սահմանում ծառայեն, ուզում ենք գնան բանակ, բայց ոչ սահմանում ծառայեն, քանի որ ինձ թվում է մինուճար տղա ունեցող ընտանիքների համար ցավալի է: Մենք ողբում ենք, ճիշտ է, բոլորի համար ենք ողբում, բայց երբ կորցնում ես տան մինուճարին, սարսափելի է: Թո՛ղ գնան ծառայեն, բայց թո՛ղ դիրքերում չլինեն, լինեն ուրիշ աշխատանքի, ուրիշ մի բան անեն: Անպայման անցնեն զինվորական ծառայություն, բայց ոչ սահմանում, ոչ կորուստներով»:
Աղունիկ Ղուկասյանը հավելեց, որ միացել են ակցիային իրենց ձայնը հանրությանը լսելի դարձնելու համար. «Խնդրում ենք կառավարությանը, որ մինուճար տղաները դիրքեր չբարձրանան»:
Ամի ՉԻՉԱԿՅԱՆ
