2016թ. մարտի 8-ին Եվրոպայի խորհուրդը հրապարակել է 2014թ. եվրոպական երկրների բանտերում տիրող իրավիճակի մասին զեկույցը։ Այս մասին տեղեկանում ենք Եվրոպայի խորհրդի պաշտոնական կայքից։
Զեկույցի համաձայն՝ Հայաստանում բնակչության մեջ կալանավորների տեսակարար կշիռը տարեցտարի ավելանում է։
2014թ. Հայաստանում կալանավորների 4,8%-ը եղել են կանայք:
Եվրոպայում դատապարտվածների ընդհանուր թվի 5%-ն են կազմում թույլ սեռի ներկայացուցիչները։
Զեկույցի տվյալների համաձայն՝ 2014թ. Հայաստանի քրեակատարողական հիմնարկներում իրենց պատիժն էր կրում 3979 դատապարտյալ։ Այս ցուցանիշը բարձր է եվրոպական միջինից. եթե Եվրոպայում ամեն 100.000 բնակչի հաշվով կա 124 կալանավոր, ապա Հայաստանում այդ թիվը 131,9 է։
Կարդացեք նաև
Համեմատության համար բերվում է 2005թ. ցուցանիշը. այդ տարի Հայաստանում 100.000 բնակչի հաշվով կար ընդամենը 87 բանտարկյալ։
2014թ. Հայաստանում կալանավորների 46,7% դատապարտված է եղել 5-10 տարվա ազատազրկման։
Զեկույցում նշվում է նաև, որ 2013թ. Հայաստանի Քրեակատարողական վարչության (ՔԿՎ) տարեկան բյուջեն եղել է 13,5 միլիոն եվրո, յուրաքանչյուր կալանավորի վրա օրական ծախսվել է միջինը 9,3 եվրո, որը 5 անգամ պակաս է եվրոպական երկրների միջին ցուցանիշից։
