Ծանրամարտի Հայաստանի կանանց եւ տղամարդկանց ազգային հավաքականներն ուսումնամարզական հավաք են անցկացնում Ծաղկաձորում: Նրանք նախապատրաստվում են ապրիլին Նորվեգիայում կայանալիք Եվրոպայի առաջնությանը:
Aravot.am-ն այսօր գլխավոր մարզիչներից հետաքրքրվեց, թե նշելո՞ւ են մարտի 8-ը եւ եթե այո՝ ինչպե՞ս:
Կանանց հավաքականի գլխավոր մարզիչ Արտաշես Ներսիսյանը գյումրեցու հումորով պատասխանեց. «Առավոտյան մարզմանը որպես նվեր աղջիկներին լրացուցիչ ծանրաբեռնվածություն եմ տվել: Մարզումային գրաֆիկը չի փոխվել: Միայն տղամարդկանց հավաքականն ամբողջ կազմով այսօր վաղ առավոտյան աղջիկներին շնորհավորեց»:
Իսկ Հայաստանի ծանրամարտի ֆեդերացիայի գլխավոր քարտուղար եւ տղամարդկանց հավաքականի գլխավոր մարզիչ Փաշիկ Ալավերդյանն ասաց. «Հավաքում գտնվող ծանրորդներն ու մարզիչները պրոֆեսիոնալներ են ու ամենայն լրջությամբ են մոտենում իրենց աշխատանքին: Բոլորն էլ մնում են իրենց օրվա ռեժիմի մեջ, որին ոչինչ չի կարող խանգարել: Այ, երեկոյան, երբ մարզումային օրը կավարտվի, մենք աղջիկներին տորթ կմատուցենք ու միասին կնշենք տոնը»:
Կարդացեք նաև
Աշոտ ՀԱԿՈԲՅԱՆ
