Բրյուսելում մարտի 7-ին տեղի կունենա Թուրքիա-ԵՄ գագաթնաժողովը: Թուրքիայի վարչապետ Ահմեթ Դավութօղլուն մինչ Բրյուսել մեկնելը լրագրողների հետ հանդիպում է ունեցել, որի ընթացքում հայտարարել է, որ Թուրքիան չի ցանկանում Սիրիան մասնատված տեսնել: Նա հավելել է, որ Թուրքիային անհրաժեշտ չէ 100 տարի առաջ տեղի ունեցած տարածաշրջանի պառակտվածության կրկնությունը. պետք է գործադրել բոլոր ջանքերը տարածաշրջանը միավորելու համար:
Այս առնչությամբ Aravot.am-ը զրուցել է թուրքագետ Ռուբեն Մելքոնյանի հետ:
«Դավութօղլուն, իմ կարծիքով, գտնվում է ինքնության երկընտրանքի առջեւ, քանի որ նրա տեսական հայտարարությունները եւ գործնական քայլերն իրարից տարբերվում են: Այսինքն՝ տեսաբան Դավութօղլուն եւ վարչապետ Դավութօղլուն, ըստ էության, անում են իրար հակադիր քայլեր: Չմոռանանք, որ նույն Դավութօղլուն է առաջարկել մի քանի այլ տեսություններ եւս՝ 0 խնդիր հարեւանների հետ, կայուն տարածաշրջան եւ այլն: Կարծում եմ՝ երբ որ գործը հասնում է իրական քաղաքականությանը, այսինքն՝ «ռեալ պոլիտիկ» վիճակին, ապա Դավութօղլու այդ տեսությունները հայտարարությունների մակարդակից այն կողմ չեն անցնում: Այս հայտարարությունը կարծում եմ՝ նույնպես նույն ճակատագրին է արժանանալու»,- ասաց նա:
Ըստ թուրքագետի, Դավութօղլուի հայտարարությունն իր մեջ հակասություն է պարունակում, քանի որ նույն Դավութօղլուն կամ Թուրքիայի կառավարությունը, նախագահը բազմիցս հայտարարել են այլ խնդիրներ, մասնավորապես՝ Սիրիայի ներկա լեգիտիմ իշխանությունները պետք է հեռանան. «Այսինքն՝ կողմ են արտահայտվել Սիրիայի մասնատմանը, կարծում եմ՝ այսօր այդ հայտարարությունները առոչինչ են: Բացի այդ էլ՝ պատմությունից միշտ հայտնի է, որ Թուրքիան տարածքային նկրտումներ է ունեցել Սիրիայի նկատմամբ, եւ գաղտնիք չէ, որ 1939 թվականին Սիրիայի մի հատված բռնակցվել է Թուրքիային, հետագայում էլ այդ նկրտումները շարունակվել են: Կարծում եմ՝ ներկայումս թուրք-սիրիական կոնֆլիկտի հիմքում թուրքական տարածքային նկրտումներն են»:
Կարդացեք նաև
Ամի ՉԻՉԱԿՅԱՆ
