«Այն, ինչ ներկայացված է, դա բացարձակ ուղղակի օրենսգիրք չէ։ Ուղղակի հայտարարություն է, որ մենք չենք պատրաստվում հեռանալ։ Դա հայտարարություն է այսօրվա բռնապետական ռեժիմի։ Հետեւաբար այդ օրենսգիրքը մեզ համար որպես օրենսգիրք չի ընկալվում եւ չի ընդունվում»,- այս մասին «Տեսակետ» մամուլի ակումբում հայտարարեց Ազգային ժողովի «Ժառանգություն» խմբակցության անդամ Զարուհի Փոստանջյանը։
Նա նշեց, որ իրենք բազմիցս հնչեցրել են իրենց առաջարկությունները. «Շուրջ 10 տարի է ինչ ես քաղաքականության մեջ եմ։ Այդ առաջարկները շուրջ 10 տարի է հնչում են եւ պատասխաններ չեն ստացել։ Այսինքն` օրենսգրքի վերաբերյալ մենք ունենք մեր հստակ դիրքորոշումը, թե ինչպիսին այն պետք է լինի եւ այդ մասին բազմիցս բարձրաձայնել ենք»։
Լրագրողները հետաքրքրվեցին, թե «Ժառանգություն»-ը որքանո՞վ է իրատեսական համարում ՀԱԿ խմբակցության ղեկավար Լեւոն Զուրաբյանի՝ միավորվելու եւ Ընտրական օրենսգրքի շուրջ ընդհանուր առաջարկներ ներկայացնելու կոչը «Դուք գիտեք, որ «Ժառանգություն»-ը ցանկացած միավորում, որը բերելու է համակարգային փոփոխությունների, ողջունում է։ Եվ եթե սա միտված է համակարգային փոփոխության, ապա իհարկե «Ժառանգությունը» կունենա մասնակցություն»,- պատասխանեց տիկին Փոստանջյանը։
Աշոտ ԻՍՐԱԵԼՅԱՆ
