Վերակազմյալ սոցիալ դեմոկրատ կուսակցությունն առայժմ չի պատրաստվում միանալ ընտրական օրենսգրքի շուրջ ՀԱԿ-ի ներկայացրած կետերին, որոնց պաշտոնապես միացել է միայն Ազգային վերածնունդը: Aravot.am-ի հետ զրույցում,ՎՍԴՀԿ ատենապետ, ԱԺ պատգամավոր Լյուդմիլա Սարգսյանն ասաց, որ իրենք նախապատրաստում են ԸՕ-ի առաջարկությունների սեփական փաթեթը, որն առաջիկայում կներկայացնեն հանրության դատին:
Կուսակցությունում մինչեւ վերջ դեռ չեն ուսումնասիրել ներկայացված նոր նախագիծը, բայց որոշ դիտարկումներ արդեն ունեն: Դրանցից մեկն էլ վերաբերվում է առաջարկվող համամասնական ընտրակարգին: «Բավականին խճճված համակարգ է ներկայացվում, որն, ըստ էության, իր մեջ ներառում է նաեւ մեծամասնական ընտրակարգ: (Այս մոտեցումն ունեն նաեւ ՀԱԿ-ում եւ Ժառանգությունում- Ն. Գ ): Անհասկանալի է մոտեցումը, բավականաչափ բացատրություններ են պետք, որպեսզի փորձենք հասկանալ, թե իրականում ի՞նչ են ուզում ապահովել այս նախագծով, դրա հեղինակները: Բազմաթիվ մտահոգիչ դրույթներ կան՝ միանշանակ»,- ասաց Լյուդմիլա Սարգսյանը հավելելով, որ որոշակի բարեփոխումների միտում էլ տեսնում, բայց դրանց կիրառության մասով հստակություն չկա:
Ընդդիմադիրները առաջարկները՝ ընտրատեղամասերում տեսախցիկների տեղադրման, ընտրողների մատների թանաքոտման, բնակիչների ռեգիստրի մաքրման, քվեարկած քաղաքացիների ցուցակների հրապարակման եւ այլն, ինչպես հայտնի է, նախագծում տեղ չեն գտել կամ բավական լղոզված են արտահայտված:
Տիկին Սարգսյանը կարծում է, որ ընդդիմադիրները պետք է պայքարեն, որպեսզի այդ կետերն ամբողջությամբ եւ հստակ ամրագրվեն օրենքում` մանավանդ, որ ընդդիմադիր ուժերի մոտեցումները հիմնականում չեն տարբերվում: Նա, իհարկե, վստահ չէ, որ նախագծի հեղինակների կողմից առանց սվինների կընդունվեն ընդդիմության առաջարկները, բայց կարծում է, որ ընդդիմությունը պետք է կարողանա լուրջ ճնշումներ գործադրել:
Կարդացեք նաև
Մեր զրուցակիցն այդքան էլ համամիտ չէ ՀԱԿ խմբակցության պատգամավոր, «Ազատություն» կուսակցության նախագահ Հրանտ Բագրատյանի առաջարկին՝ իջեցնել անցողիկ շեմի տոկոսը երեք տոկոսի: Ինչ-որ տեղ ընդունելի է համարում նախագծի հեղինակներից Հրայր Թովմասյանի այն բացատրությունները, որ 67 կուսակցություն կա եւ շեմն իջեցնելու դեպքում 10-12 երեք հոգանոց խմբակցություններ կձեւավորվեն, որոնք, ըստ էության խորհրդարանում որեւէ դերակատարում չեն կարողանա իրականացնել՝ փոշիացնելով ընդդիմադիր դաշտի ընտրողների ձայները:
Լյուդմիլա Սարգսյանը դրական է համարում մոտեցումը, որ կայուն մեծամասնություն ձեւավորելու համար երեք կուսակցությունից ավել չեն կարող կոալիցիա կազմել: «Իշխանությունը կարող է 4-5 ուժի հետ պայմանավորվել՝ ստեղծել մեծամասնություն, հուսահատ թողնելով հանրության ընդդիմադիր դաշտի այն ընտրազանգվածին, որոնք կարծել են, թե այդ կուսակցությունները ընդդիմադիր են»,- հիմնավորվում է մեր զրուցակիցը:
Նելլի ԳՐԻԳՈՐՅԱՆ
