Մեծ Բրիտանիայի վարչապետ Դևիդ Քեմերոնը 2016թ. մարտի 7-ին Բրյուսելում կայանալիք Եվրամիություն-Թուրքիա գագաթնաժողովի գործընկերներին կոչ կանի աջակցել Անկարային և օգնել Աթենքին՝ փախստականների անօրինական միգրացիայի դեմ պայքարում։ Այս մասին տեղեկացնում է ռուսական «ՏԱՍՍ» լրատվական գործակալությունը։
Խոսելով փախստականների անօրինական միգրացիայի մասին՝ Քեմերոնն ասել է. «Միգրացիոն ճգնաժամը ամենամեծ խնդիրն է, որին այսօր բախվել է Եվրոպան։ Մեծ Բրիտանիան երբեք չի հանդիպել փախստականների այնպիսի մեծ հոսանքների խնդրի, ինչպես եվրոպական մյուս երկրները, որովհետև մենք դուրս ենք Շենգենյան համաձայնությունից և պահպանել ենք վերահսկողությունը մեր սահմանների նկատմամբ։ Բայց այնտեղ, որտեղ կարող ենք օգնել, մենք պետք է անենք դա»։
Թեմայի առնչությամբ հայտարարություն է տարածվել նաև Մեծ Բրիտանիայի վարչապետի նստավայրից։ Հայտարարության մեջ մասնավորապես ասվում է, որ Բրիտանիան պետք է աջակցի Թուրքիային, որը արդեն ընդունել է 2,6 միլիոն փախստական և օգնի Աթենքին՝ արագացնելու փախստականների հայտերի մշակման և ապօրինի գաղթել ցանկացողներին իրենց երկրները վերադարձնելու գործընթացը։
