Ֆինանսների նախարարության եւ Պետական եկամուտների կոմիտեի տարանջատումը մի քանի հանգամանքներով է հիմնավորվում: Իշխանության ներկայացուցիչներն այս առանձնացումը պայմանավորում են ԵՏՄ անդամակցությամբ, սահմանադրական փոփոխություններով, 2 քաղաքական ուժերի համաձայնագրով, ՀՀ նախագահի փետրվարի 12-ի ելույթով եւ դրանից բխող դրույթների իրականացմամբ, նոր տնտեսական քաղաքականության մշակմամբ: Ինչ հիմնավորում էլ ներկայացվի՝ հանրության եւ գործարար միջավայրի համար առավել կարեւոր է, որ այդ կառույցները՝ միասին, թե առանձին, ոչ թե խոչընդոտեն, այլ նպաստեն տնտեսական հավասար մրցակցությանը, ստվերի կրճատմանը, տնտեսությունում կոռուպցիայի վերացմանը եւ տնտեսության զարգացմանը:
Երեկ ՀՀ նախագահ Սերժ Սարգսյանը ՊԵԿ-ի նոր նախագահ Հովհաննես Հովսեփյանին ՊԵԿ-ում ներկայացնելիս նշել է. «Նրանք, ովքեր համարում են, որ մենք հասել ենք մի այնպիսի աստիճանի, երբ զարգացումը, երբ կոռուպցիայի, հովանավորչության դեմ պայքարն այլեւս անհրաժեշտություն չէ, ապա կարծում եմ՝ այդ մարդիկ չեն կարող առաջ տանել համակարգի զարգացումները»: Թե ինչ ազդեցություն կունենա ՀՀ նախագահի այս հայտարարությունն ու ինչպես կպայքարի ՊԵԿ նոր ղեկավարն իր աշխատակազմով կոռուպցիայի եւ հովանավորչության դեմ՝ ցույց կտա ժամանակը:
Կառավարության կառուցվածքում պարբերաբար կատարվող փոփոխությունները, ըստ տնտեսագետ Մեսրոպ Առաքելյանի, պայմանավորված չեն լինում կառավարման որակի բարելավմամբ կամ երկրի զարգացման մոդելի փոփոխությամբ: «Առավոտի» հետ զրույցում Առաքելյանն ասաց, որ ոչ միայն կառուցվածքային փոփոխությունները, այլեւ գործառույթները որեւէ դրական ազդեցություն չեն ունենում տնտեսության որակական զարգացման վրա. «Այդ տեսանկյունից ֆինանսների նախարարության տարանջատումը կամ միացումը որեւէ դրական ազդեցություն չի ունենա: Սակայն զուտ տնտեսագիտական տեսանկյունից առավել նպատակահարմար է առանձին կառույցների առկայությունը, քանի որ հարկային մարմինները պետք է ընդամենը կատարեն հարկերի հավաքագրման ֆունկցիա, իսկ բարեփոխումների, զարգացման ֆունկցիաները, այդ թվում՝ հարկային բարեփոխումների մասով, պետք է կատարի ֆինանսների եւ էկոնոմիկայի միավորված նախարարությունը, որը ժամանակին ունեցել ենք»:
Հիշեցնենք, որ ժամանակին հարկային եւ մաքսային մարմիններն էլ առանձին էին գործում, դրանք միավորվեցին 2008 թվականին:
Կարդացեք նաև
ՆԵԼԼԻ ԲԱԲԱՅԱՆ
«Առավոտ» օրաթերթ
04.03.2016
