«Ակօս» լրատվամիջոցը հոդված էր հրապարակել, որտեղ բացահայտվում էր Հրանտ Դինքի սպանության գործով դատավարության մայր փաստաթղթերին կցված նոր մեղադրանքում տեղ գտած մի զեկույց, որը կազմել է Թուրքիայի Ազգային հետախուզության ծառայությունը (MIT)։ Այս մասին հայտնում է «Ակօսը»։
Բացահայտված զեկույցը չի վրիպել քրդամետ Ժողովուրդների դեմոկրատական կուսակցության պատգամավոր Գարո Փայլանի ուշադրությունից։ Զեկույցի բացահայտվելուց հետո հայազգի պատգամավոր Փայլանը 14 հարցից բաղկացած գրություն է ներկայացրել Թուրքիայի Ազգային մեծ ժողովի ղեկավարությանը, որով վարչապետ Դավութօղլուից պարզաբանումներ է պահանջում նշված հարցերի վերաբերյալ։
Պատգամավորը, ի թիվս մնացած հարցադրումների, պահանջում է պատասխանել հետևյալ հարցերին. «Ներկայումս շարունակվո՞ւմ են արդյոք գրվել նման զեկույցներ», «Երբվանի՞ց են պատրաստվում այդ զեկույցները», «Ո՞ր կառույցների պահանջով են գրվում նման զեկույցներ», «Ի՞նչ կարգադրության կամ հրամանի հիման վրա են կազմվել այդ զեկույցները», «Ազգային հետախուզության ծառայության կազմում կա՞ն արդյոք առանձին բաժիններ, որոնք զբաղվում են փոքրամասնություններին հետևելով»։
«Ակօսի» հրապարակած նյութից տեղեկանում ենք, որ Թուրքիայի Ազգային հետախուզության հրապարակած գաղտնի զեկույցը պատրաստվել է 2011թ.։ Զեկույցի «Էթնիկ անջատողական գործողություններ» վերնագրված բաժնում տեղեկություններ են հրապարակվել հայկական, հունական և ոչ մուսուլման փոքրամասնությունների վերաբերյալ, որոնք ձեռք են բերվել Թուրքիայի հետախուզական ծառայությունների իրականացրած գործողությունների արդյունքում։
Կարդացեք նաև
Զեկույցի «Հայկականություն» բաժնի «ներքաղաքական կարևոր զարգացումներ» ենթավերնագրում տեղ են գտել նաև փաստաթղթի պատրաստման ժամանակահատվածում Հրանտ Դինքի սպանության գործի մանրամասները։
Մեկ այլ՝ «Արտասահմանյան կարևոր զարգացումներ» ենթավերնագրի ներքո անդրադարձ է կատարվում Թուրքիայի սահմաններից դուրս գործող հայկական կազմակերպությունների գործունեությանը։
