«Կովկաս» ինստիտուտի տնօրեն, քաղաքագետ Ալեքսանդր Իսկանդարյանը կարծում է, որ Հայաստանի Հանրապետության երկրորդ նախագահ Ռոբերտ Քոչարյանն այսօր քաղաքական շուկայի մասնակից չէ։
«Հայելի» ակումբում լրագրողների հետ հանդիպմանը քաղաքագետը նշեց, որ Հայաստանի ներկայիս քաղաքական շուկային մասնակցելու համար անհրաժեշտ է ունենալ «կամ լուրջ քաղաքական կուսակցություն, կամ լուրջ փող, կամ էլ լուրջ չինովնիկ լինել»։
Ալեքսանդր Իսկանդարյանն ասաց, որ իր տեղեկություններով Ռոբերտ Քոչարյանը լուրջ գումարների չի տիրապետում. «Մնացած երկուսը նա հաստատ չունի։ Նա չինովնիկ չէ եւ լուրջ քաղաքական ուժ չունի»։
Նա չի հավատում, որ մի հոգի, սեղանի տակ նստած, պարանները քաշում եւ կառավարում է բոլորին. «Իմ մասնագիտությունն այլ է։ Այդ պատճառով ես չեմ տեսնում Ռոբերտ Քոչարյանին որպես քաղաքականության լուրջ բաղադրիչ։ Բայց դա չի նշանակում, որ նա մի օր այդպիսին չի դառնա։ Ինչո՞ւ ոչ»։
Կարդացեք նաև
Քաղաքագետը հիշեցրեց, որ առաջին նախագահ Լեւոն Տեր-Պետրոսյանը 10 տարի չէր երեւում քաղաքական ասպարեզում. «Նա նստած էր իր տանը եւ գրքեր էր գրում ու այգի էր փորում։ Հետո եկավ քաղաքականություն»:
Աշոտ ԻՍՐԱԵԼՅԱՆ
