«Հանրապետականի կուսակցության ժամանակ՝ 2000 թվականի 30 հազարը դարձել է 44 հազար»,- մարտի 4-ին «ՀՀ ժողովրդագրական իրավիճակի բարելավման 2016-2018 թթ. ազգային ծրագրի եւ դրա իրականացումն ապահովող միջոցառումների ծրագրին հավանություն տալու մասին» ՀՀ կառավարության արձանագրային որոշման նախագիծը թեմայով խորհրդարանական լսումներից հետո լրագրողների հետ զրույցում ասաց ԱԺ սոցիալական հարցերի մշտական հանձնաժողովի նախագահ Հակոբ Հակոբյանը:
Նա հորդորեց լրագրողներին հանգիստ թողնել Հայաստանի հանրապետական կուսակցությանը եւ անդրադառնալ ժողովրդագրությանը. «Եթե դուք հետ գնաք՝ ձեր կենսագրությունը ուսումնասիրեք, կտեսնեք, որ ձեր պապերը, ձեր ծնողները շատ ավելի վատ պայմաններում են ապրել եւ ավելի շատ երեխաներ են ունեցել: Հետեւաբար՝ ասել, որ սոցիալ-տնտեսական վիճակը ծանր է, երեխաներ չենք ունենում, անհասկանալի է: Մտածողությունը, մարդկանց էգոիզմն է շատացել, եթե ավելի բարդ տերմիններ օգտագործենք, մարդկանց մեջ էգոիզմն է շատացել, սա փաստ է: Սա էլ է մեկ բաղադրիչ, ընդամենը մեկ բաղադրիչ հազարավորներից»:
Հակոբ Հակոբյանը նշեց, որ ներկայացված ծրագիրը կօգնի ժողովրդագրական խնդիրների լուծմանը. «Ժողովրդագրությունը շատ բաղադրիչներից բաղկացած համակարգ է, որի համար երեք համակարգ՝ առողջապահությունը, կրթությունը եւ սոցիալական ապահովությունը, պետք է ամեն օր, ամեն տարի, ամեն րոպե ուշադիր լինեն, աչալուրջ լինեն, որպեսզի կարողանան խնդիրների լուծումը գտնել»:
Ամի ՉԻՉԱԿՅԱՆ
