Ֆրանսիայի Փարիզ և Մարսել քաղաքներում, Ավստրիայի Վիեննա քաղաքում Հայաստանի «Էխո» հասարակական կազմակերպության եւ Ֆրանսիայի «Հայ ուսանողական միության» ջանքերով առաջիկայում կկազմակերպվեն բարեգործական համերգներ, որոնց հասույթը կտրամադրվի հաշմանդամություն ունեցող երեխաների վերականգնողական բուժմանը: Այս մասին այսօր «Անդրադարձ» մամուլի ակումբում լրագրողներին հայտնեցին կազմակերպիչները:
«Հայաստանում նախկինում եւս բարեգործական համերգներ կազմակերպել ենք, սակայն Եվրոպայում առաջին անգամ ենք նման նախաձեռնությամբ հանդես գալիս: Գաղափարը Ֆրանսիայում բնակվող ընկերոջինս է: Հանդիպեցինք երգիչների հետ, որոնք մեծ սիրով եւ պատրաստակամությամբ են մոտենում համերգներին»,-ասաց «Էխո» ՀԿ նախագահ Սերյոժա Օհանջանյանը:
Նա տեղեկացրեց, որ «Էխո» ՀԿ-ում գրանցված են մանկական ուղեղային կաթված ունեցող 200 երեխաներ, որոնց շարունակական բուժման համար միջոցներ են պետք. «Հայաստանը չի կարող այդ երեխաների համար այլընտրանքային սարքավորումներ եւ ծառայություններ ապահովել: Կառավարությունը միայն սայլակներ եւ քայլակներ է ստանում, բայց ոչ մանկական սայլակներ: Այն սայլակները, որոնք ստացել ենք, տեղափոխման համար հարմար չեն, չեն փակվում, հնարավոր չէ տաքսու մեջ տեղավորել: Մեզ պետք են կանգնակներ, հատուկ հեծանիվներ, որոնք երեխային պետք են անընդհատ մարզվելու համար: Պետական կառույցները քիչ են եւ չեն հասցնում սպասարկել բոլոր երեխաներին: Քչերն են վերականգնողական կուրս անցնում»:
Համերգներին մասնակցելու են ժողովրդական երգիչներ Դավիթ Հակոբյանը, Գրիգոր Միրզոյանը, Եվա Եգանյանը եւ այլք, որոնք կատարելու են ժողովրդական-գուսանական երգեր: «Միշտ կանգնած ենք հաշմանդամություն ունեցող երեխաների կողքին: Սփյուռքը եւս պատրաստ է օգնելու: Վստահ եմ, որ այս համերգների ընթացքում էլ այդպես կլինի»,-նշեց Եվա Եգանյանը:
Կարդացեք նաև
Հավելենք, որ բարեգործական համերգներ կազմակերպելու առաջարկներ են ստացվել նաեւ Եվրոպայի այլ երկրների հայկական համայնքներից, ինչպես նաեւ ԱՄՆ-ի հինգ նահանգներից:
Լուիզա ՍՈՒՔԻԱՍՅԱՆ
