«Սա պետք է լինի ուղերձ շատ գործարարներին, որ հարկահավաքն այլեւս չի լինելու ծանոթ-ընկեր-բարեկամ շրջանակում»,- Aravot.am-ի հետ զրույցում ասաց ԱԺ տնտեսական հարցերի հանձնաժողովի անդամ, «Ժառանգություն» խմբակցության պատգամավոր Թեւան Պողոսյանն` անդրադառնալով նախագահ Սերժ Սարգսյանի կողմից ՊԵԿ նոր ղեկավարի ներկայացման ժամանակ արած հայտարարություններին եւ այն փաստին, որ նախագահն անձամբ ներկայացրեց Հովհաննես Հովսեփյանին:
Սակայն, ի հեճուկս նույն հանձնաժողովի իշխանական խմբակցության անդամ Գարեգին Նուշիկյանի, որը վստահ է`առաջիկայում ականատեսն ենք լինելու դրական փոփոխությունների, ընդդիմադիր պատգամավորը նկատում է. «Սա մեր ենթադրությունն է, քանի որ քիչ չենք տեսել դեպքեր, երբ Սերժ Սարգսյանի կողմից եղել են նման ելույթներ կամ ներկայացումներ, բայց ոչինչ այդպես էլ չի փոխվել»:
Թեւան Պողոսյանը մատնանշում է ամենավառ օրինակը, երբ տարիներ առաջ, նախագահական նստավայրում Սերժ Սարգսյանը հայտարարեց` ատկատների «դեմը պետք է առնել», «խոշոր ձկներին գլխից պետք է բռնել» ու հարցնում է. «Դրանից հետո քանի՞ ձուկ բռնվեց»:
«Հասկանալի է, որ մեր երկրում տնտեսության իրավիճակն այնքան վատ է, որ հարկահավաքությունն այլեւս դարձել է ազգային անվտանգության խնդիր: Իսկ պետությունն առանց հարկերի չի լինում»,- ասաց մեր զրուցակիցը` հավելելով, որ պատկերացման եւ ներկայացման շրջանակում ենթադրվում է, որ էական փոփոխություններ պիտի լինեն, բայց որքանո՞վ դա կիրագործվի` կյանքը ցույց կտա:
Կարդացեք նաև
Նելլի ԳՐԻԳՈՐՅԱՆ
