Արամ Սարգսյանը՝ ԵՏՄ-ի եւ ՌԴ-ից եկած Մարտի 1-ի հրամանի մասին
«Մեր ժողովուրդն իր կեցությամբ, իր ձեւով ավելի շատ եվրոպական է, քան ասիական: Կապ չունենք մենք էդ ՀԱՊԿ ու ԵվրԱզԷս ասած սլավոնամուսուլմանական կառույցների հետ, որոնք ո՛չ Ղարաբաղի հարցով, ո՛չ որեւէ այլ հարցով մեզ հետ համաձայն չեն: Իրենք փլավ են սիրում, մենք՝ խորոված, տարբեր բաներ ենք բացարձակ»,- Aravot.am-ի հետ զրույցում «Հանրապետություն» կուսակցության նախագահ Արամ Սարգսյանը այսպիսի ճաշատեսակային պատկերավոր համեմատություններով ցույց տվեց, որ Հայաստանն ու ԵՏՄ-ն ինչքան տարբեր են իրարից, ու մենք իրավունք չունեինք եվրոպական արժեքները թողած՝ ԵՏՄ-ին անդամակցեինք:
Արամ Սարգսյանը գիտի, որ մեր հասարակությունում շատերը չեն ընդունում իր այդ մոտեցումները եւ նայում են ՌԴ-ի կողմը. «Իրենց զավակները գնում են փող աշխատելու այն երկրներ, որտեղ լեզու գիտեն, գալ-գնալու հնարավորություն ունեն: Բայց վստահեցնում եմ, որ օր օրի շատանում են այն մարդիկ, ովքեր հասկանում են, որ ընտրությունը մոդելի մեջ է: Փոփոխությունը իրական ձեւի մեջ է, ոչ թե ես ավելի լավ կծառայեմ, ավելի ազնիվ կլինեմ, ավելի բարի կլինեմ: Ակնհայտ է, որ Մարտի 1-ից առաջ նախագահ Քոչարյանը Ռուսաստան գնաց, եւ այնտեղից եկավ այդ հրամանը: Ակնհայտ է, որ էդ մոդելը հեղափոխություններ, արդար ընտրություններ չի սիրում, էդ մոդելում Նազարբաեւը պիտի մնա, Լուկաշենկոն պիտի մնա, էդ մոդելն էդպիսին է: Մեզ պետք է այն մոդելը, որտեղ գործող նախագահ Սարկոզին երկրորդ շրջանը գնալուց պարտվում է ու շնորհավորում է հաղթողին: Մեզ էսպիսի մոդել է պետք: Մենք մեր գործունեությունը շարունակելու ենք այս շրջանակներում»:
Ըստ Արամ Սարգսյանի՝ իր առաջարկած մոդելի կողմնակիցները այնքան են շատանալու, միավորվելու, որ կարելի է 2017-ի ընտրություններին ակնկալել հաղթանակ. «Մեր ժողովուրդն իր տեղը միանշանակ գտնելու է: Ես անձամբ միշտ հավատացել եմ նրան, ինչ ասել եմ: Բազմաթիվ անգամ սխալ ենք եղել, հետո հասկացել եմ, որ էս բանը սխալ էր: Բայց եթե չհավատայի՝ չէի ասի: Ժողովուրդն ինձ լսել է մի պարզ պատճառով՝ իմանալով, որ ես դրան հավատում եմ: Համաձայն են, թե համաձայն չեն՝ չեմ ստում: Ասում եմ էն, ինչ մտածում եմ, ասում եմ էն, ինչ գիտեմ, չեմ թաքցնում»:
Կարդացեք նաև
ՀՌԻՓՍԻՄԵ ՋԵԲԵՋՅԱՆ
«Առավոտ» օրաթերթ
03.03.2016
