Ժիրայր Դադասյանի մեկնաբանությունները
Օրերս «Առավոտի» հերթական հանդիպումը ռեժիսոր, ՀՀ արվեստի վաստակավոր գործիչ, Երեւանի մնջախաղի պետական թատրոնի գեղարվեստական ղեկավար Ժիրայր Դադասյանի հետ «ստեղծագործական» համատեքստում չէր: Մեզ հետաքրքրում էր, թե ինչու, ի տարբերություն հայաստանյան թատրոնների, մասնավորապես՝ երեւանյան, էլիտար համարվող այս ժանրի մշակութային միակ օջախը ամանորյա տոներից հետո դեռեւս չի շարունակում իր գործունեությունը:
Ասվածի առիթով Ժիրայր Դադասյանը պարզաբանեց. «1974թ. հիմնված, 1983թ. պետական կարգավիճակ ստացած մեր թատրոնն աշխատում է վարձակալության հիմունքներով, վերջին տասը տարիներին էլ «տեղակայված» ենք Պատանի հանդիսատեսի թատրոնում: Հետեւաբար, թատրոնի գործունեությունը հարմարեցնում ենք, այս դեպքում՝ Պատանի հանդիսատեսի թատրոնի ժամանակացույցի հետ: Ինչ վերաբերում է 2015-16թթ. թատերաշրջանի շարունակությանը, այն կվերսկսենք մարտի 10-ին, իմ ռեժիսուրայով «Գիրք ծաղկանց» ներկայացմամբ՝ ըստ Դերենիկ Դեմիրճյանի համանուն վիպակի»:
Տեսարաններ «Գիրք ծաղկանց»-ից:
Էլիտար արվեստ համարվող մնջախաղը ենթադրում է էլիտար հանդիսատես, հետեւաբար հետաքրքրվեցինք՝ տոկոսային հարաբերակցությամբ դա համապատասխանո՞ւմ է իրականությանը, եթե, իհարկե, մեզանում դեռ մեծամասնություն է կազմում այդ խաղը: «Անկասկած, մնջախաղի արվեստը էլիտար արվեստ է, բայց ոչ միայն էլիտայի համար: Մեր հանդիսատեսին ես անվանում եմ սերուցքային: Օրինակ, մարտի 10-ին կայանալիք ներկայացմանը սիրով արձագանքել են նաեւ Անանիա Շիրակացու անվան ճեմարանի սաները, շուրջ 100 հանդիսական: Համոզված եմ, որ սա խոսուն փաստ է ու ձեր հարցի պատասխանը,- հայտնեց պարոն Դադասյանը, հետո էլ հավելեց,- ի դեպ, մեր հանդիսատեսը ինքնաբավ է, որը մերօրյա ինֆորմացիոն աղմուկից թաքնվելու տեղ է որոնում: Տեղ, որտեղ իր համար կբացահայտի բոլորովին ուրիշ աշխարհ: Ընդ որում, մի սխալ ընկալում կա մեզանում. շատերն են խոսում, այդ թվում՝ թատրոնի մարդիկ, թե հանդիսատեսը պետք է բեմում տեսնի այն, ինչը գերակշռում է մեր կյանքում: Նման կերպ մտածողներին պետք է հիասթափեցնեմ՝ թատրոնի իրականությունը պետք է տարբերվի կենցաղայինից կամ՝ այն, ինչը կատարվում է բեմում, ակնհայտորեն պետք է հարստացնի մարդու ներաշխարհը, ինչու չէ՝ նաեւ կարգավորի ու հավասարակշռության բերի այն»:
Մեր զրուցակցից հետաքրքրվեցինք 2 տարին մեկ ամռանը Ծաղկաձորում անցկացվող Լեոնիդ Ենգիբարյանի անվան մնջախաղի միջազգային փառատոնի ճակատագրով, քանի որ այս տարի, եթե այն, իհարկե, կայանա, ապա փառատոնը կգրանցի իր 5-ամյակը: «Ի պատիվ վարչապետ Հովիկ Աբրահամյանի, այսուհետ փառատոնին վիճակված է լինել ավանդական»,- առանց մանրամասնելու՝ հայտնեց Ժիրայր Դադասյանը:
Կարդացեք նաև
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
03.03.2016
