Ֆինանսների նախարարությունից պետական եկամուտները` հարկային ու մաքսային ծառայություններն անջատելու հանրապետության նախագահ Սերժ Սարգսյանի երեկվա որոշումն անսպասելի էր, ինչն էլ հասարակության շրջանում տարաբնույթ մեկնաբանությունների տեղիք է տվել:
Երեկվանից Ֆիննախի եւ ՊԵԿ-ի ղեկավարի աթոռի համար թեկնածուների անուններ են շրջանառվում` կանխատեսմամբ, որ Սերժ Սարգսյանը որոշել է հրաժեշտ տալ ֆինանսների նախարար Գագիկ Խաչատրյանին:
Թե մեր երկրի քաղաքացիներին նախագահն է՞լ ինչ անակնկալ է պատրաստել եւ ովքեր կզբաղեցնեն թափուր աթոռները պարզ կդառնա մոտ օրերս: Մինչ այդ ներկայացնենք ֆինանսների նախարարության կատարած գնումները: Այսպես. ֆիննախը ֆիքսված հեռախոսակապի մատուցած ծառայությունների դիմաց «Յուքոմ» ընկերությանը կվճարի 70 միլիոն դրամ: Այս մասին տեղեկանում ենք կառավարության մեկ անձից գնումներ բաժնից:
Հիշեցնենք, որ այս գերատեսչությունը «յուքոմիֆիկացվեց» Գագիկ Խաչատրյանի` նախարար դառնալուց հետո:
Կարդացեք նաև
Քանի որ այս նախարարություն ինչ-ինչ պատճառներով ամբողջությամբ չի հրաժարվել հեռախոսակապի ծառայություն մատուցող «ԱրմենՏել» ընկերությունից, որի հետ պայմանագիրը կնքել էր դեռեւս պետական եկամուտների կոմիտե եղած ժամանակ, ֆիննախը «Արմենտելին» վճարել է 384 հազար դրամ: Մեկ այլ որոշմամբ էլ ֆիննախը այս օպերատորին վճարել է 1 միլիոն 221,400 դրամ: Սակայն այս գումարներն անհամեմատ փոքր թիվ են կազմում «Յուքոմին» վճարած գումարների դիմաց:
Նույն աղբյուրից տեղեկանում ենք, որ «Յուքոմին» միլիոններ են վճարել նաեւ այլ պետական կառույցներ` Պետական գույքի կառավարման վարչությունը, 2 միլիոն 40 հազար դրամ, ՀՀ քաղաքացիական ծառայության խորհուրդը` 2 միլիոն 455 հազար դրամ, Էներգետիկայի եւ բնական պաշարների նախարարությունը` 2 միլիոն դրամ:
Այս տարվա մյուս ամիսներին ֆիննախի կատարած այլ գնումների, ինչպես նաեւ 2015 թվականի գնումների մասին տեղեկատվությունը կառավարության կայք էջում անհասանելի էր, այդ տարեթվերի գնումներին ծանոթանալու փորձերին կայք էջին հայտնվում էր` «Տվյալ էջը գոյություն չունի» գրությունը:
Լուսինե ԲՈՒԴԱՂՅԱՆ
