Օրերս Սանկտ Պետերբուրգի Մարիինյան թատրոնի Շոստակովիչի անվան սրահում կազմակերպված «Միջազգային վոկալ մրցույթների դափնեկիրների համերգը» երեկոյին հրավիրված էր նաեւ Ազգային օպերային թատրոնի մեներգիչ Հովհաննես Ներսեսյանը:
Երիտասարդ բասը դեռեւս ուսանում է Կոմիտասի անվան պետական կոնսերվատորիայի մագիստրատուրայում՝ ճանաչված բարիտոն, ՀՀ վաստակավոր արտիստ Գեւորգ Հակոբյանի ղեկավարությամբ: Բնականաբար, ստեղծագործական երկար կենսագրություն չունի. շուրջ 2 տարի է, ինչ համալրել է թատրոնի մեներգիչների ցանկը: Հովհաննես Ներսեսյանին հանդիպել ենք թատրոնի գեղարվեստական ղեկավար Գեղամ Գրիգորյանի ռեժիսուրայով իրականացրած երկու բեմադրություններում՝ Ա. Տիգրանյանի «Անուշում», որտեղ հանդես է եկել քյոխվա եւ Տ. Չուխաջյանի «Արշակ Երկրորդում»՝ Ներսես կաթողիկոսի կերպարում: 2015թ. արվեստագետը մասնակցել է Ռիմսկի-Կորսակովի ծննդավայրում՝ Տիխվին քաղաքում ավանդաբար անցկացվող միջազգային մրցույթին ու արժանացել առաջին մրցանակի: Իսկ մինչ այդ դափնի է շահել Կրասնոդարում անցկացվող «Օպերա առանց սահմանների» մրցույթում:
Հովհաննես Ներսեսյանը՝ Անի Եփրիկյանի (ձախից) եւ Լարիսա Գերգիեւայի հետ:
«Առավոտի» հետ հանդիպման ժամանակ հետաքրքրվեցինք՝ երիտասարդ երգչի անունը երբվանի՞ց է հայտնի դարձել Մարիինյան թատրոնում: «Ժամանակին մասնակցածս միջազգային մրցույթներում ժյուրիի կազմում եղել է նաեւ Մարիինյան թատրոնի ակադեմիայի ղեկավար Լարիսա Գերգիեւան, ում մոտ անցյալ տարի վարպետության դասերի եմ մասնակցել Երեւանի թատրոնում»,- հայտնեց Հովհաննես Ներսեսյանը: Հետո էլ ավելացրեց, թե կայացած երեկոյի ընթացքում հանդես է եկել Դավիթ-Բեկի արիայով՝ Ա. Տիգրանյանի համանուն օպերայում, ինչպես նաեւ իտալական եւ ռուսական օպերաներից 5 արիաներով: Առաջիկա ծրագրերի մասին էլ Հովհաննես Ներսեսյանը նշեց, որ պատրաստում է Օրորեզոյի դերերգը՝ Բելինիի «Նորմա» օպերայում:
Երգիչը՝ Ներսես կաթողիկոսի կերպարում:
Երգիչն իր կարիերան զուգահեռում է Արարատյան հայրապետական թեմի առաջնորդանիստ Սուրբ Սարգիս եկեղեցում իբրեւ սարկավագ: Հետաքրքրությանը՝ ինչու որոշեց հոգեւորական դառնալ, եթե օպերային հակումներ ուներ, արվեստագետը պատասխանեց. «Նախնիներս ժամանակին հայրենադարձվել են Սիրիայից: Մեր ընտանիքում ընդունված կարգ էր ամեն կիրակի մասնակցել պատարագի: Տատիկիս ուղեկցությամբ եկեղեցի էի գնում ու մանուկ ժամանակվանից շփվում հոգեւոր երաժշտության հետ: Տասը տարեկանից արդեն ցանկություն առաջացավ ծառայել եկեղեցուն, եւ արդեն 20 տարի է՝ Սուրբ Սարգիս եկեղեցու հոգեւոր սպասավոր եմ»: Ասաց նաեւ, որ միջազգային մրցույթներին մասնակցել է Արարատյան հայրապետական թեմի առաջնորդական փոխանորդ գերաշնորհ տեր Նավասարդ արքեպիսկոպոս Կճոյանի օրհնությամբ եւ աջակցությամբ: Հարցին՝ իսկ ձգտում ունի՞ հոգեւոր բարձր աստիճանների, Հովհաննես Ներսեսյանն ասաց. «Մեծ փափագ ունեմ քահանա լինելու: Ինչ վերաբերում է բարձրաստիճան հոգեւորական դառնալուն, հասկանալի պատճառներով չեմ հասնի դրան՝ հայկական ավանդական ընտանիք կազմելու շեմին եմ: Ի դեպ, ապագա տիկինս էլ մշակութաբան Անի Եփրիկյանն է»:
ՍԱՄՎԵԼ
ԴԱՆԻԵԼՅԱՆ
Կարդացեք նաև
«Առավոտ» օրաթերթ
01.03.2016
