Երգչուհի Շուշան Պետրոսյանի արտահայտությունը չի կարելի սպառնալիք ընդունել: Այս միաձայն եզրահանգմանն է եկել ԱԺ էթիկայի հարցերով ժամանակավոր հանձնաժողովը:
Այսօր «Անդրադարձ» ակումբում անդրադառնալով երեկ ԱԺ էթիկայի հանձնաժողովի որոշմանը, ըստ որի՝ էթիկապես խախտում չի ճանաչվել ՀՀԿ խմբակցության պատգամավոր Շուշան Պետրոսյանի` «Ֆեյսբուք» կայքում մեկ այլ օգտատերին ուղղված գրառումը, որ նրա աչքերը կհանի, ասաց հանձնաժողովի նախագահ Խոսրով Հարությունյանը:
Նա պատմեց, որ երգչուհու վիրավորանքի հասցեատիրոջը ու դիմումատուին հրավիրել են հանձնաժողով, որ նրանց նկատառումները լսեն, հասկանան՝ ինչքանով է սպառնալիքը իրական, բայց հրավիրյալներից ոչ ոք չի ներկայացել:
Մինչդեռ Շուշան Պետրոսյանը ներկայացել է, հանգամանալից պատասխանել իրենց հարցերին, ասել շարժառիթները, թե ինչու է այդպես ասել. «Ըստ էության, միաձայն որոշում կայացվեց, որ Շուշան Պետրոսյանի արտահայտությունը չի կարելի սպառնալիք ընդունել, և նա չի խախտել հանձնաժողովի համապատասխան կետը… Առաջնորդվում ենք հետևյալ ընկալումներով, երբ խոսքը գնում է սահմանապահ զինվորականի հուղարկավորության կապակցությամբ միջադեպի կոպիտ արտահայտած մտքերին, մենք որակել ենք Շուշան Պետրոսյանի արտահայտությունը որպես սաստելու, այդպիսի մտքերը համացանցում կասեցնելու և սթափեցնելու վարք: Այսինքն, մենք հեռու ենք այն կարծիքից, որ նույն Գայանե Շահինյանը դադարեց խոսել, որովհետև ենթադրում էր, որ եթե խոսի, կարող է Շուշան Պետրոսյանը գա և իր աչքերը հանի»:
Կարդացեք նաև
Խոսրով Հարությունյանը կարծում է, որ պետք է հաշվի առնել նաև, թե այդ արտահայտության հեղինակն ով է. «Մշակույթի ներկայացուցիչ, վաստակավոր գործիչ, և իր արժեհամակարգով բոլորովին այլ համակարգի տեր մարդ»:
Հարցին, թե այսինքն՝ ով ինչ ուզում է կարող է ասել, Խոսրով Հարությունյանը հստակեցրեց. «Մենք խոսում ենք կոնկրետ դեպքի մասին»:
Հարցին, իսկ Առաքել Մովսիսյանի խոսքերը իրական վտանգ կարո՞ղ են ընկալել, երբ հայտարարել էր, որ կբռնաբարի նախարարին չարախոսողներին, Խոսրով Հարությունյանը մանեւրեց. «Այդ ժամանակ ես Էթիկայի հանձնաժողովում չեմ եղել»:
Արփինե ՍԻՄՈՆՅԱՆ
