«Ես չգիտեմ՝ այլ գործիչներից կտրել են, չեն կտրել, ես չեմ կարող ասել՝ իրենց հետ ինչ է տեղի ունեցել, բայց որ կոնկրետ որեւէ բառ անգամ կտրված եւ մոնտաժված չէր, ես կարող եմ միանշանակ պնդել»,- այս մասին Aravot.am-ի հետ զրույցում ասաց «Բարգավաճ Հայաստան» կուսակցության նախագահ Նաիրա Զոհրաբյանը:
Նշենք, որ ՀՀԿ փոխնախագահ Արմեն Աշոտյանի ամեն ուրբաթ Հանրային հեռուստաընկերության եթերով հեռարձակվող «Եռանկյունի» հաղորդաշարի անցած շաբաթվա թողարկմանը մասնակցում էին ԲՀԿ նախագահ Նաիրա Զոհրաբյանը, ԱԺ ՀՀԿ խմբակցության ղեկավար Վահրամ Բաղդասարյանը եւ ՀԱԿ խմբակցության քարտուղար Արամ Մանուկյանը:
Մեզ հետ զրույցում Նաիրա Զոհրաբյանն ասաց, թե հնարավոր է, որ այլոց դեպքում նման հարց եղել է, բայց իր դեպքում վստահաբար չի եղել: «Ես չեմ կարծում, որ այնքան հաճելի խոսքեր էի ասում իշխանությունների հասցեին, որ ականջահաճո էր: Կրկնում եմ, որեւէ բառ կտրված չի եղել»:
Անդրադառնալով այն մեղադրանքներին, թե հաղորդման ընթացքում Արմեն Աշոտյանն անաչառ չէ եւ խոսելու քիչ ժամանակ է տալիս ընդդիմադիրներին՝ ԲՀԿ նախագահը նշեց, որ. «Որ հաղորդավարը հանրապետական Արմեն Աշոտյանն է եւ, բնականաբար, ունի խիստ ընդգծված հանրապետական կողմնորոշում՝ միանշանակ է: Բայց այն հաղորդումը, որին ես եմ մասնակցել, բոլորից շատ ես եմ խոսել եւ թույլ չեմ տվել Աշոտյանին կամ մյուս մասնակիցներին ինձանից շատ խոսել»:
Կարդացեք նաև
Հաղորդման վերջում, երբ Արմեն Աշոտյանը եզրափակիչ խոսքն էր ասում՝ Նաիրա Զոհրաբյանն հարցրեց. «Ոնց վերջացա՞վ արդեն: Բայց ես շատ բան ունեի ասելու»: Մեր հարցին, թե փաստորեն ինքը չի կարողացել իր խոսքն ամբողջությամբ ներկայացնել, տիկին Զոհրաբյանը պատասխանեց. «Ես էլի ասելիք ունեի, անկեղծ ասած: Ամեն դեպքում ես կարծում եմ, որ նույնիսկ գերազանցել եմ հավասարությունը, որը պիտի լիներ ու խոսել եմ եւ հաղորդավարից, եւ երկուս մասնակիցներից ավելի շատ: Գենդերային պոզիտիվ դիսկրիմինացիայի եմ ենթարկել հաղորդման երեք մասնակից տղամարդկանց: Հասկանում եմ, որ իրենց դա դուր չեկավ, բայց դե ինչ արած»:
Աշոտ ԻՍՐԱԵԼՅԱՆ
Լուսանկարը՝ Արմեն Աշոտյանի Ֆեյսբուքի էջից
