«Սա պետք է լինի բաց գործընթաց»,- փետրվարի 29-ին լրագրողների հետ զրույցում, անդրադառնալով ընտրական օրենսգրքին, ասաց ԱԺ պատգամավոր Հովհաննես Մարգարյանը:
Նա նկատեց, որ խոսվում է մի փաստաթղթի մասին, որին ծանոթ չեն: Անդրադառնալով այն հանգամանքին, որ ընտրական օրենսգրքի նախագիծը ուղարկվել է Վենետիկի հանձնաժողով, Հովհաննես Մարգարյանն ասաց, որ այդ գործելաոճն անընդունելի է. «Պետք է ի սկզբանե դա լինի հրապարակային: Գիտեք, խոսում ես մի կարեւոր գործընթացի մասին, մի փաստաթղթի մասին, որին չես կարող ո՛չ գնահատական տալ, ո՛չ առաջարկություն ներկայացնել, որովհետեւ դրան ծանոթ չես, չի քննարկվել: Եվ շատերը «եթե, ապա»-ով են խոսում, մի մասն ասում է՝ արդեն ուղարկել ենք, սպասում ենք գա, նոր քննարկման առարկա դարձնենք: Բնական է, մի քանի անգամ էլ Սահմանադրությունն ուղարկվեց Վենետիկի հանձնաժողով՝ փորձաքննության, եւ տեսանք դիրքորոշումները»:
Հովհաննես Մարգարյանը հայտարարեց, որ չի ցանկանում, որ ընտրական օրենսգրքի ընդունման գործընթացը նմանվի Սահմանադրությանը. «Թո՛ղ լինի բաց, թափանցիկ, որպեսզի մենք կարողանանք մեր մոտեցումները եւ տեսակետները արտահայտենք»:
Ամի ՉԻՉԱԿՅԱՆ
