«Ռեալ այս պահին դժվարանում եմ որեւէ բան ասել, քանի դեռ նախագիծը հանրայնացված չէ, Ազգային ժողով չի մտել»,- փետրվարի 29-ին լրագրողների հետ զրույցում, անդրադառնալով ընտրական օրենսգրքին, ասաց ԱԺ պատգամավոր Ռուբեն Հակոբյանը:
Նա նշեց, որ կարող է խոսել ընտրական օրենսգրքի մասին, երբ առաջարկությունները լինեն ձեռքին: Ռուբեն Հակոբյանը հավելեց, որ ինքն էլ ունի առաջարկություններ, եւ դեռ 1996 թվականին Ազգային ժողովում ներկայացրել է մի նախագիծ, որտեղ համապետական վարկանիշային համամասնական ընտրակարգն էր դրված. «Իհարկե՛, պետք է շատ պրոֆեսիոնալ, մասնագիտական մոտեցում ցուցաբերել, որ այս ընտրական օրենսգիրքը, որը կարեւորագույնն է լինելու այս նստաշրջանի համար, որ ունենանք այնպիսի օրենսգիրք, որը կարող է ապահովել իրական ձայներով խորհրդարան ձեւավորելու գործընթացը»:
Խոսելով այն հանգամանքի մասին, որ առանց Ազգային ժողովի քննարկման՝ նախագիծը արդեն ուղարկվել է Վենետիկի հանձնաժողով, Ռուբեն Հակոբյանն ասաց, որ տեղյակ չէ, թե ինչ ձեւաչափով է ուղարկված, բայց կարծում է, որ նաեւ վերջնական տեսքով ընտրական օրենսգրքի նախագիծը պետք է ուղարկել Վենետիկի հանձնաժողով:
Ամի ՉԻՉԱԿՅԱՆ
