«Արդեն 3-րդ տարին է, ՄԱԿ-ը Հայաստանի կառավարությունից հարցնում է, թե ինչ են արել մարտի 1-ի զոհերի իրավահաջորդների առողջապահական, հոգեբանական, ֆինանսական փոխհատուցման համար եւ ինչպիսի պատիժներ են ստացել մարտի 1-ի կատարողներն ու կազմակերպիչները»,- «Բլից ինֆո» մամուլի ակումբում լրագրողների հետ հանդիպմանը հայտարարեց ԱԺ ՀԱԿ խմբակցության քարտուղար Արամ Մանուկյանը:
Ըստ նրա՝ արդեն 3 տարի է Հայաստանի կառավարությունը պատշաճ պատասխան չի տալիս Մարդու իրավունքների հանձնաժողովի այս հարցերին. «Էդուարդ Նալբանդյանն ինձ մեկ տարի առաջ ասաց, որ դա շատ բարդ է, քանի որ տարբեր գերատեսչություններից պետք է պատասխաններ ստանանք: Այդ պատճառով էլ պատասխանները տրված չեն, կամ տրված են թերի»:
Նա նշեց, որ Մարդու իրավունքների եվրոպական դատարանը վարույթ է ընդունել մարտի 1-ի գործը եւ այն հասել է կոմունիկացիաների փուլ. «Նոյեմբերին ՄԻԵԴ-ը դիմել է Հայաստանի կառավարությանը, պատասխանելու գործի հետ կապված հարցերին: Պատասխանելու փոխարեն Հայաստանի իշխանությունները 3 ամիս ժամանակ են խնդրել, պետք է դեկտեմբերին պատասխանեին: Այնպես են արել, որ այդ ժամանակը գա մարտի 1-ն անցնի»:
Արամ Մանուկյանը հարց բարձրացրեց, թե ինչ է արվել այս 8 տարիների ընթացքում, որ պարզ հարցերին հնարավոր չէ պատասխանել ու կառավարությունը խնդրել է 3 ամիս երկարացնել ժամկետը: «Այդ գործով բացարձակ առաջընթաց չկա: Ակնհայտ է, որ իշխանությունները գնում են ծածկելու, հետաձգելու, մոռացության տալու ճանապարհով»:
Կարդացեք նաև
Աշոտ ԻՍՐԱԵԼՅԱՆ
