«Որեւէ մարդու իրավունքների պաշտպան Հայաստանում դեռեւս միանշանակ չի ասել, որ կան քաղբանտարկյալներ: Բոլորը խուսափողական պատասխաններ են տվել»,- Aravot.am-ի հետ զրույցում ասաց ԱԺ ընդդիմադիր պատգամավոր, նախկին քաղբանտարկյալ Ալեքսանդր Արզումանյանը:
Պարոն Արզումանյանը, հիշեցնենք, խորհդարանում «կողմ» քվեարկեց մարդու իրավունքների պաշտպանի` քաղաքական մեծամասնության ներկայացրած թեկնածուին` Արման Թաթոյանին, մինչդեռ, վերջինս, ի հեճուկս տարբեր ընդդիմադիր պատգամավորների հարցերի, այդպես էլ չասաց, որ Հայաստանում մարդիկ հալածվել են իրենց քաղաքական հայացքների համար:
Մինչդեռ ԵԽԽՎ-ն իր 1609, 1620 բանաձեւերում, ԵԽ մարդու իրավունքների հանձնակատար Թոմաս Համարբերգը, Ագոյի խումբը, միջազգային իրավապաշտպան կազմակերպություններն այդ առիթով հստակ ամրագրումներ են արել:
Այս ամենի ֆոնին նախկին քաղբանտարկյալ Ալեքսանդր Արզումանյանի «կողմ» դիրքորոշումը Արման Թաթոյանի թեկնածությանը միանշանակ չընկալվեց:
Կարդացեք նաև
«Ինքն իր պատասխանում ասաց, որ պետք է գործերի բոլոր հանգամանքներին ծանոթանա, որից հետո կկարողանա գնահատականներ տալ: Դա արդեն մամուլի գործն է. հետեւեք, որ ծանոթանա եւ գնահատականներ տա»,- ասաց մեր զրուցակիցը` հավելելով. «Մենք դա իր հետ մանրամասն քննարկել ենք, մարտի 1-ի բոլոր գործերով, կառավարության պատասխաններն ուղարկվել են ՄԻԵԴ, մինչեւ իր`Հայաստանի ներկայացուցչի տեղակալի պաշտոնը ստանձնելը: Որեւէ մասնակցություն մարտի 1-ի գործերով ինքը չի ունեցել»:
Նելլի ԳՐԻԳՈՐՅԱՆ
