Դիլիջան քաղաքի բնակչուհի Նարինե Ալիխանյանը 2015թ. մայիսի 21-ին դիմել է Տավուշի մարզի ընդհանուր իրավասության դատարան իր ամուսնուն՝ 1956թ. ծնված Գագիկ Մարտիրոսյանին մահացած ճանաչելու պահանջով: Նրա դիմումն ընդունվել է դատավոր Աշոտ Խաչիկյանի վարույթ:
2015թ. մայիսի 25-ին դատարանը որոշում է կայացրել Գ. Մարտիրոսյանին մահացած ճանաչելու վերաբերյալ գործ հարուցելու մասին Նարինե Ալիխանյանի հաշվին մամուլում հաղորդագրություն հրապարակել: Այդ հաղորդագրությունը տպագրվել է «Հայաստանի հանրապետություն» օրաթերթի 2015թ. հունիսի 10-ի համարում, որից հետո Գ. Մարտիրոսյանի գտնվելու վայրի մասին դատարան տեղեկություն չի ստացվել:
Դիլիջանի քաղաքապետարանից դատարան ստացված գրության համաձայն` Դիլիջան քաղաքի Մանթաշյան փողոցի թիվ 2 բ տան բնակիչ Գագիկ Մարտիրոսյանը շուրջ 8 տարի բացակայում է Դիլիջանից, քաղաքապետարանը նրա գտնվելու վայրի մասին տեղեկություն չունի:
Ըստ «Դատալեքս » դատական տեղեկատվական համակարգի՝ 2015թ. հուլիսի 23-ին Տավուշի մարզի առաջին ատյանի դատարանի դատավոր Աշոտ Խաչիկյանը որոշել է հայցը բավարարել եւ Գ. Մարտիրոսյանին ճանաչել մահացած:
Կարդացեք նաև
Գագիկ Մարտիրոսյանի քույրը՝ Երեւան քաղաքի բնակչուհի Նելլի Գաբրիելյանը Գ. Մարտիրոսյանին մահացած ճանաչելու վճիռը վերացնելու պահանջով 2015թ. նոյեմբերի 28-ին դիմել է Տավուշի մարզի դատարան: Նա դատարանին հայտնել է, որ իր եղբայր Գ.Մարտիրոսյանը նախկին կնոջից ամուսնալուծվելուց հետո երկրորդ անգամ ամուսնացել է Դիլիջանի բնակչուհի Նարինե Ալիխանյանի հետ,որը նրանից փոքր է 16 տարով: Համատեղ ամուսնական կյանքի ընթացքում նրանք բնակվել են այդ ընթացքում ձեռք բերված Մանթաշյան 2բ հասցեում գտնվող տանը: 1999թ. ծնվել է նրանց որդին:
Ընտանեկան անախորժությունների պատճառով` 2006թ. Գ. Մարտիրոսյանը հեռացել է տնից եւ բնակություն հաստատել Երեւանում, քրոջը՝ Ն. Գաբրիելյանին պատկանող բնակարանում: 2007թ. Գ. Մարտիրոսյանը սրտի կաթված է ստացել, անդամալույծ դարձել եւ մինչ օրս անկողնային վիճակում է:
Երեւան քաղաքի Կենտրոն եւ Նորք-Մարաշ վարչական շրջանների ընդհանուր իրավասության դատարանի 2012թ. նոյեմբերի 23-ի վճռով հաստատվել է Նելլի Մարտիրոսյանի խնամակալության տակ Գ, Մարտիրոսյանի գտնվելու փաստը: Ն. Գաբրիելյանը եղբոր անձնագիրը փոխելու համար դիմել է անձնագրային բաժին եւ իմացել, որ Տավուշի մարզի դատարանի կողմից Գ. Մարտիրոսյանը մահացած է ճանաչվել:
2016թ. փետրվարի 5-ին Դիլիջան քաղաքում դատավոր Աշոտ Խաչիկյանը վճռել է Ն. Գաբրիելյանի դիմումը բավարարել, եւ վերացնել Գագիկ Մարտիրոսյանին մահացած ճանաչելու մասին 2015թ. հուլիսի 23-ին իր կայացրած վճիռը:
Ոսկան ՍԱՐԳՍՅԱՆ
