«Ավետիս» ասոցիացիան ստեղծվել է 2011թ.-ին, Շվեյցարիայում բնակվող մեր հայրենակցուհի, օպերային երգչուհի Վարդուհի Խաչատրյանի նախաձեռնությամբ: «Ավետիս»-ի նպատակն է տարածել հայ մշակույթը, ներկայացնել հայ երաժիշտ արվեստագետներին` Եվրոպայում: Ասոցիացիայի կողմից վերջերս հիմնվել է նաեւ «Ավետիս» փառատոնային նվագախումբը, որը կազմված է լինելու շվեյցարացի եւ շվեյցարաբնակ հայ երաժիշտներից եւ դիրիժորներից:
Նվագախումբը լինելու է փոփոխվող` կամերայինից մինչեւ մեծ սիմֆոնիկ կազմ, իսկ գլխավոր դիրիժոր եւ գեղարվեստական ղեկավարն է լինելու հանրաճանաչ ջութակահար եւ դիրիժոր Սերգեյ Օվստրովսկին։
«Ավետիս»-ի ուշադրության կենտրոնում լինելու են մասնավորապես հայ դիրիժորները, որոնք հաճախ կհրավիրվեն ղեկավարելու այս նվագախումբը։ «Ավետիս» փառատոնային նվագախումբը իր առաջին ելույթն ունենալու է այս տարվա մարտի 6-ին, Ժնեւի հեղինակավոր «Վիկտորիա Հոլլ» համերգասրահում` «ՎԻՎԱ Կալլաս» համերգով:
Համերգին հնչելու են օպերային ստեղծագործություններ՝ աշխարհահռչակ սոպրանո Մարիա Կալլասի երգացանկից: Համերգին, որպես մենակատար հանդես է գալու Maria Callas GRAND PRIX-ի մրցանակակիր Վարդուհի Խաչատրյանը, իսկ որպես դիրիժոր Իսրայելից հրավիրված` հանրաճանաչ երաժիշտ Վագ Պապյանը: Նվագախմբի հետագա ծրագրերում է նաեւ հայ նվագախմբային ստեղծագործությունների տարածումը Եվրոպայում։ Վարդուհի Խաչատրյանը, չբացելով փակագծերը, նշեց, որ այս տարի «Ավետիս»-ի 5-ամյա տարեդարձն անակնկալներով լեցուն է լինելու։
Կարդացեք նաև
«Առավոտ» օրաթերթ
27.02.2016
