Այսօր «Արենա» համալիրում բոուլինգի մրցումով մեկնարկեց «Առավոտ» օրաթերթի եւ ՀԱՕԿ-ի համատեղ անցկացվող ԶԼՄ-ների սպարտակիադան:
Մասնակցության հայտ ներկայացրել էին շուրջ 20 լրատվամիջոցների մոտ 40 աշխատակիցներ: Համառ, բայց նաեւ գործընկերային մթնոլորտում ընթացած պայքարում որոշվեցին տղամարդկանց ու կանանց պայքարի հաղթողներն ու մրցանակակիրները, որոնց համար ՀԱՕԿ-ը սահմանել է դրամական պարգեւներ:
Կանանց մրցաշարում առաջատարների եռյակը կազմեցին Մարինե Կարապետյանը (Երկիր մեդիա հեռուստաընկերություն), Անուշ Աղաբաբյանը (Armbowling.am) եւ Անահիտ Գրիգորյանը («Առավոտ» օրաթերթ): Տղամարդկանց մեջ հաղթեցին Սեւակ Գրիգորյանը (news.press.am), Աշոտ Հակոբյանը (Aravot.am) եւ Մհեր Ղալեչյանը (Չորրորդ իշխանություն):
Մրցաշարի ավարտին ՀԱՕԿ-ի կոմերցիոն վարչության պետ Մանե Մուրադյանը, շնորհավորելով բոլոր մասնակիցներին, նշեց, որ Հայաստանի ազգային օլիմպիական կոմիտեն, նախագահ Գագիկ Ծառուկյանը միշտ կանգնած են օլիմպիական շարժումը Հայաստանում զարգացնելու, առողջ ապրելակերպը ազգաբնակչության բոլոր խավերում տարածելու, արմատավորելու դիրքերում, առավելագույնս աջակցում են մարդու առողջության պահպանմանն եւ ամրապնդմանն ուղղված ցանկացած նախաձեռնության եւ ԶԼՄ-ների սպարտակիադան դրա ապացույցն է:
Կարդացեք նաև
Աշոտ ՀԱԿՈԲՅԱՆ
Լուսանկարը՝ ՀակԲերի
