Գյումրու ամենաաղքատ տնակային թաղամասերից մեկում՝ «Ֆանտաններ»-ում, այսօր տեղի ունեցավ աշխարհահռչակ ջազ դաշնակահար, գյումրեցի Տիգրան Համասյանի բարեգործական համերգը: Այն տեւեց մոտ մեկ ժամ, հնչեց նաեւ նոր ստեղծագործություն. Տիգրան Համասյանը երբեմն հաղորդակցվում էր հանդիսատեսի հետ ու խոսում գյումրեցու բարբառով: Նկատենք, որ չնայած մեծ թվով մարդկանց ներկայությանը՝ ջազ դաշնակահարի ելույթի ժամանակ ամայի դաշտում քար լռություն էր, նրա երկրպագուները ուղղակի վայելում էին նրա կատարումները:
Համերգին մասնակցելու էին եկել ինչպես Հայաստանի տարբեր անկյուններից, այնպես էլ արտերկրից, ընդ որում սփյուռքահայերից բացի, կային օտարազգիներ:
Հետաքրքիրն այն է, որ այս բոլոր մարդիկ հասցրեցին պտտվել Գյումրու ցեխոտ փողոցներով: Համերգի կազմակերպիչների պլանավորած ծրագրի համաձայն, Սավոյան փողոցի 227/269 տնակի բակ հասնելու ու Տիգրան Համասյանին ունկնդրելու համար, անհրաժեշտ էր մոտ 200 մետր քայլել ոտքով, որպեսզի մի պահ ապրես ու զգաս, թե ինչքան դժվար է ցեխոտ փողոցներով դեպի հրեշավոր տնակ տանող կյանքը: Ոտքով ցեխաջրերի մեջ ցատկոտելով՝ հյուրերը մի կերպ հասան «համերգասրահ»:
Հիշեցնենք, որ Տիգրան Համասյանի համերգի նպատակը ուշադրություն սեւեռելն է գյումրեցի անօթեւանության խնդրին: Գյումրեցի լուսանկարիչ Հայկ Բարսեղյանը, որի լուսանկարներում տեղ են գտել Գյումրու թշվառությունը, անօթեւան ընտանիքների կյանքը, 13 բնակարան ձեռք բերելու համար սկսել է բարեգործական միջոցառումների համալիր ծրագիր, որի իրագործման համար անհրաժեշտ է հավաքել 120 հազար ֆունտ: Այսօր հայտնի դարձավ, որ հավաքվել է 35 հազար դոլար ու ծրագրի իրականացման համար քիչ ժամանակ է մնացել. մարտի 20-ը վերջնաժամկետ է:
Կարդացեք նաև
Aravot.am-ի հարցին՝ կհաջողվի՞ 120 հազար ֆունտ հավաքել, Հայկ Բարսեղյանն ասաց, որ պարզ կդառնա միայն ծրագրի վերջին օրը: «Ծրագիրը շարունակական բնույթ է կրելու, եթե կարողանանք հավաքել ու տան հարցը լուծել, ապա ամեն ինչ պետք է անենք, որ իշխանություններն այս հարցը հիմնովին լուծեն: Վերջնանպատակը փոխվել է, մեր ձայնով, որն արժեք ունի, իշխանություններին ստիպենք քայլեր ձեռնարկել»,- ասաց Հայկ Բասեղյանը:
Նա նաեւ տեղեկացրեց, որ Գյումրու քաղաքապետարանից բացի, կենտրոնական իշխանությունները չեն արձագանքել իրենց ծրագրին, արձագանք, դրամական փոխանցումներ եղել են դրսից ու միջազգային մամուլի ուշադրությունն են գրավել Հայկ Բարսեղյանի տեղեկացմամբ, BBC-ն նկարահանման է գալիս Հայաստան՝ հատուկ այս խնդիրը բարձրաձայնելու:
Նունե ԱՐԵՎՇԱՏՅԱՆ
