Ավարտվեց «Հայ-չինական մշակութային փառատոնը», որի արդյունքները «Նոյան Տապան» լրատվական գործակալությունում հրավիրված մամուլի ասուլիսում ամփոփեցին Հայաստանի ավանդական ուշուի ֆեդերացիայի նախագահ Տիգրան Չոբանյանը եւ «Սանգուան» առողջարարական կենտրոնի հիմնադիր Լիլիա Կարապետյանը:
Փետրվարի 8-ից 25-ը Հայաստանի ճարտարապետների միությունում եւ «Ակումբ» ռեստորանային համալիրում անցկացվեցին վեց տարբեր միջոցառումներ, որոնք համատեղ կազմակերպել էին նաեւ ՀՀ սպորտի եւ երիտասարդության հարցերի նախարարությունը, Չինական գիտամշակութային կենտրոնը: Փառատոնի ինֆորմացիոն աջակիցն էր «Նոյան Տապան» լրատվական գործակալությունը:
Տիգրան Չոբանյանը հատուկ շնորհակալություն հայտնեց նաեւ «Կարին» համույթի ղեկավար Գագիկ Գինոսյանին, որն իր խմբով միջոցառման ամբողջ ընթացքում ցուցադրեց հայոց ռազմական պարերը, իսկ վերջին միջոցառմանը նաեւ ներկաներին ուսուցանեց դրանք:
Տիգրան Չոբանյանը, սակայն, զարմանք հայտնեց, որ այս հետաքրքիր եւ ճանաչողական միջոցառումները ԶԼՄ-ների արժանի ուշադրությանը չարժանացան, առավել եւս, որ Հայաստանը հին քաղաքակրթության կրող է, որի մշակութային ժառանգությունը հայտնի է ամբողջ աշխարհին: Նա նաեւ տարակուսանք հայտնեց, որ որեւէ աջակցություն չեղավ մշակույթի նախարարությունից եւ Հայաստանում ՉԺՀ դեսպանատնից: «Անհրաժեշտ է պրոպագանդել այն, ինչով հպարտանալու լիարժեք իրավունք ունենք, այլ ոչ թե լուսաբանենք էժանագին սենսացիաները», – ասաց նա:
Բոլոր միջոցառումների ժամանակ զուգահեռներ անցկացնելով Հայաստանի եւ Չինաստանի բազմադարյան մշակույթների (նաեւ սպորտի ոլորտում) եւ ավանդույթների միջեւ՝ կազմակերպիչները ներկաներին եւ հյուրերին ցույց տվեցին, որ մենք ոչնչով չենք զիջում Չինաստանին: Ի դեպ, վերջին օրը հայկական ռազմական պարեր սովորեցնելուց բացի, հյուրերի, հատկապես՝ գեղեցիկ սեռի ներկայացուցիչների համար, ինքնապաշտպանության եւ ինքնակառավարման դասընթացներ կազմակերպվեցին:
Լիլիա Կարապետյանը, շնորհակալություն հայտնելով բոլոր աջակիցներին եւ հովանավորներին, նշեց, որ այս միջոցառումը լինելու է ավանդական եւ տարեցտարի դրանց որակը եւ քանակը ավելանալու է: Բանախոսները, մասնավորապես, նշեցին, որ ապագայում փառատոնի շրջանակներում պլանավորում են ընդգրկել նաեւ Հայկական կոխ ըմբշամարտը, որը պատմական հարուստ ժառանգություն ունի:
Աշոտ ՀԱԿՈԲՅԱՆ
