Քաղաքացիական ակտիվիստ Վարդգես Գասպարիի պաշտպան Դավիթ Գյուրջյանը չգիտի, թե ինչու Վերաքննիչ դատարանը այսօր կեսօրին որոշեց փոխարինել իր պաշտպանյալի նկատմամբ խափանման միջոցը չհեռանալու մասին ստորագրությամբ:
Հիշեցնենք, որ Գասպարիի փաստաբանների վերաքննիչ բողոքով նիստն այսօր նախատեսված էր ժամը 17:30, սակայն Վերաքննիչ դատարանը, ավելի շուտ անցկացրեց այն՝ փաստաբանների բացակայությամբ, ինչպես որ Գասպարիի կալանավորման որոշումն էր ընդունել առանց փաստաբանների բացակայությամբ:
«Չգիտենք՝ դատարանի՝ ավելի շուտ վճիռը հրապարակելու որոշման դրդապատճառն ու հրատապությունը»,- ասաց փաստաբանը:
Վարդգես Գասպարին էլ մեզ հետ կարճ զրույցում ասաց, որ կապաքինվի տանը՝ նորմալ պայմաններում, ու այս պահին դեռ չունի որոշում բուժհաստատություն տեղափոխվելու վերաբերյալ:
Կարդացեք նաև
Հիշեցնենք, որ Վարդգես Գասպարին կալանավորվել էր փետրվարի 19-ին։ Նա մեղադրվում է ոստիկանին վիրավորելու, դատական նիստերը խանգարելու և դատավորի հասցեին անվայելուչ արտահայտություններ անելու մեջ։
Արփինե ՍԻՄՈՆՅԱՆ
