Շենգավիթ վարչական շրջանի ընդհանուր իրավասության դատարանում դատավոր Նելլի Բաղդասարյանի նախագահությամբ շարունակվում է Վարդգես Գասպարիի գործի քննությունը:
Հայտարարված ընդմիջումից հետո Վարդգես Գասպարին հայտարարությամբ հանդես եկավ: Նա ասաց, որ ինքը երբեք չի հրաժարվել իր պաշտպաններից եւ շարունակում է պնդել, որ բոլոր դեպքերում, բոլոր գործերով, բոլոր հանգամանքներում բացառապես Տիգրան Եգորյանը, Լուսինե Հակոբյանը եւ Դավիթ Գյուրջյանն են իր պաշտպանները: Նելլի Բաղդասարյանը հետաքրքրվեց, թե արդյոք Գասպարին համաձա՞յն է, որ դատարանը գործում ներգրավվի Տիգրան Եգորյանին եւ Լուսինե Հակոբյանին:
Տիգրան Եգորյանը պատասխանեց. «Իմ վստահորդը հայտարարեց, եթե ինչ-որ բան սխալ է ընկալվել, խնդրեմ պարզաբանում պահանջեք, կպարզաբանեմ»: Նելլի Բաղդասարյանը կրկնեց հարցը՝ հավելելով, որ Տիգրան Եգորյանը այդ պահին որեւէ լիազորություն չունի: Եգորյանը հայտարարեց, որ Գասպարին պատասխանել է իր հարցին, Նելլի Բաղդասարյանը ասաց, որ դատարանը ընդունեց, որ Գասպարին ցանկանում է, որպեսզի դատարանը ներգրավվի: Տիգրան Եգորյանը նկատեց, որ Գասպարին նման հայտարարություն չի արել:
Գասպարին եւս մեկ հայտարարությամբ հանդես եկավ: Նա ասաց, որ ինքը պնդել է, որ ոստիկանության ներկայացուցիչները մարդասպաններ են եւ մարտի 1-ին սպանել են իր հարազատներին: Նելլի Բաղդասարյանը խնդրեց, ըստ էության, խոսել՝ քրեական գործի հետ կապված, հակառակ դեպքում՝ դատարանը կընդհատի իրեն:
Կարդացեք նաև
Երբ Տիգրան Եգորյանը ցանկացավ տեսակետ արտահայտել Նելլի Բաղդասարյանն ասաց, որ ինքը ներգրավված չէ գործին, եւ նույնիսկ խնդրել նրան Լուսինե Հակոբյանի հետ լքել դահլիճը: Վարդգես Գասպարին հայտարարեց, որ ինքը չի հրաժարվել իր պաշտպանից, եւ Տիգրանի Եգորյանին որպես իր պաշտպան: Դատարանը գործում ներգրավվեց Տիգրան Եգորյանին եւ Լուսինե Հակոբյանին:
«Մենք գնա՞նք, թե՞ մնանք»,- հետաքրքրվեց Տիգրան Եգորյանը: «Դուք լավ չեք լսում, այո՞»,- պատասխանեց Նելլի Բաղդասարյանը: «Ոնց որ Դուք»,- ասաց Եգորյանը: Նելլի Բաղդասարյանը խնդրեց չվիրավորել, եւ քանի որ Տիգրան Եգորյանը չի ենթարկվում նախագահող դատավորին, կիրառեց դատական սանկցիա՝ նախազգուշացում:
Եգորյանը պահանջեց իրավական հիմքը նշել: Նելլի Բաղդասարյանը հայտարարեց, որ մեկ անգամ եւս նման վերաբերմունք դրսեւորելու դեպքում Եգորյանի նկատմամբ կկիրառվի առավել խիստ դատական սանկցիա:
«Դուք պարտավոր եք բացատրել, թե ինչի հիման վրա եք իմ նկատմամբ սանկցիա կիրառում»,- ասաց Եգորյանը:
Նելլի Բաղդասարյանը հայտարարեց, որ դատարանը կկիրառի դատական սանկցիա եւ կդիմի Փաստաբանների պալատին: Դատարանը հեռացավ խորհրդակցական սենյակ՝ որոշում կայացնելու: Դահլիճը արձագանքեց որոշմանը՝ ներկաները սկսեցին հարվածել ապակուն եւ վանկարկել՝ «Ամոթ»:
Ամի ՉԻՉԱԿՅԱՆ
