«Ես առիթ ունեցել եմ ասելու, որ ԱԺ էթիկայի հանձնաժողովի գործառույթները պետք է լինի շահերի բախումների խնդիրը: Պետք է հայտարարագրերի անճշտությունների խնդիրները ուսումնասիրության առարկա դառնային, իսկ մենք, այսպես ասած, զբաղված ենք միջանձնային երկխոսության գեղեցիկ կամ ոչ գեղեցիկ լինելու մասին քննարկումներով»,- Aravot.am-ի հետ զրույցում ասաց ԱԺ էթիկայի հանձնաժողովի ընդդիմադիր անդամ Թեւան Պողոսյանն`անդրադառնալով Եվրախորհրդի կոռուպցիայի դեմ պայքարի ԳՐԵԿՈ խմբի`երեկ Հայաստանի վերաբերյալ հրապարակած զեկույցին:
Թեւան Պողոսյանն ամբողջությամբ կիսում է զեկույցում արտահայտված դիտողությունները: Նա համակարծիք է նաեւ, որ հանձնաժողովի աշխատանքը ավելի վստահելի կլինի, եթե պատգամավորների դեմ հայցերը քննեն ոչ թե գործընկեր-օրենսդիրները, այլ անկախ մարմին, որը կունենա նաև համարժեք պատիժ սահմանելու հնարավորություն: Մեր զրուցակիցը նկատում է, որ արդեն գոյություն ունեցող բարձրաստիճան պաշտոնյաների էթիկայի հանձնաժողովի գործառույթների մեջ դա պետք է լիներ, բայց այդ մարմնի գործունեությունն էլ բավական ձեւական բնույթ է կրում:
Aravot.am-ի հետ զրույցում ԱԺ էթիկայի հանձնաժողովի նախագահ, ՀՀԿ խմբակցության պատգամավոր Խոսրով Հարությունյանն էլ էր համաձայնել նշյալ դիտողությունների հետ`ասելով, որ այդ գործառույթների միակ իրականացնողը չի կարող ԱԺ էթիկայի հանձնաժողովը լինել, համակարգային լուծում է պետք:
Թեւան Պողոսյանը համաձայն է նաեւ այս գնահատականի հետ: Ավելին, հիշեցնում է, որ ՄԻՊ-ի թեկնածության քննարկման ժամանակ, խորհրդարանում, իր ելույթում ինքը հայտարարել է, որ ամենակարեւոր օրենքը, որն այս տարի պետք է ընդունվի, դա ԱԺ կանոնակարգ-օրենքն է: Այս բոլոր խնդիրները այն պետք է իր մեջ ներառի եւ լուծումներ առաջարկի, այլապես չի կարող մարմինը (խորհրդարանը) լինել վատը, նրա մեջ աշխատող մեկ կառույցը (էթիկայի հանձնաժողովը) լինել լավը:
Կարդացեք նաև
Նելլի ԳՐԻԳՈՐՅԱՆ
