Հայաստանում ավտոփոխադրումների շուկան բավականին ազատականացված է եւ մենաշնորհներ չկան, սակայն չնայած այս հանգամանքին՝ մեր երկրում տարանցիկ փոխադրումների հարկ ու տուրքերն այնքան բարձր են, որ բեռնափոխադրում իրականացնող օտարերկրյա կազմակերպությունները կաշխատեն շրջանցել Հայաստանը եւ իրենց բեռներն այլընտրանքային ճանապարհներով տեղափոխել:
Այսօր «Տեսակետ» մամուլի ակումբում Միջազգային բեռնափոխադրումներ իրականացնող «Ապավեն» ընկերության գործադիր տնօրեն Գագիկ Աղաջանյանը մտահոգություն հայտնեց բարձր հարկերի վերաբերյալ` ասելով որ մեր հարեւանները, որոնք բեռնափոխադրումների համար հանդիսանում են տարանցիկ երկրներ, հարկերը, մաքսերը, ենթակառուցվածքները հարմարեցնում են տարանցիկ փոխադրումներին, քանի որ դրանցից ստացվող եկամուտը շատ ավելին է լինում:
Գագիկ Աղաջանյանի խոսքերով, տարանցիկ փոխադրման համար ամեն մի կիլոմետրի դիմաց 220 դրամ պետք է վճարի բեռնափոխադրողը. «Մուտքի վճար, ելքի վճար, իսկ ամենաաբսուրդն այն է, որ տարանցիկ անուղղակի տարանցման համար այնպիսի թվեր են, որ ձեռնտու չէ քո երկրով անցնեն»:
Մանրամասները` տեսանյութում
Գագիկ Աղաջանյանը գտնում է, որ ավտոփոխադրումների շուկան արագ տեմպերով պետք է զարգացնել, որպեսզի հետ չմնանք տարածաշրջանային զարգացումներից:
Ըստ նրա շուտով շահագործման կհանձնվեն երկու երկաթուղիներ, որոնցով Հյուսիս-հարավ ճանապարհներն ըստ էության կիրականանան: Իսկ Հայաստանին մնում է ավտոփոխադրումների շուկան, որի մի մասը մեր երկիրը կարող է իր վրա վերցնել:
«Եթե մենք դա էլ չանենք, ուրեմն ավտոփոխադրողների շուկան էլ ենք մենք կորցնելու եւ տարանցիկության մասին մեկընդմիշտ կարելի է մոռանալ»:
Պարոն Աղաջանյանն ասաց, որ մաքսային օրենսդրության մեջ անհրաժեշտ է փոփոխություններ անել, որպեսզի բեռնափոխադրողները անտեղի վճարումներ չկատարեն: Օրինակ` մեր երկրում խնդիր է տարանցման ժամանակ տրանսպորտային միջոցի փոփոխությունը. եթե տարանցիկ բեռը մի տրանսպորտային միջոցից փոխվեց մեկ այլ տրանսպորտային միջոց, ապա, ըստ պարոն Աղաջանյանի, համարվում է «ռեէքսպորտ» եւ հավելյալ վճար պահանջում:
Այս խնդրով, բեռնափոխադրողները դիմել են հարկայինի եւ մաքսայինի պատասխանատուներին, որպեսզի օրենքները վերանայվեն:
Պարոն Աղաջանյանը նաեւ հայտնեց, որ նավթի գնի նվազմամբ պայմանավորված, տարանցման գները խիստ նվազել են. «Հայաստանից Չինաստան 25-26 տոննա բեռը տեղափոխելը արժենում է 1700 դոլար»:
Լուսինե ԲՈՒԴԱՂՅԱՆ
