ԱՄՆ Միջազգային զարգացման գործակալության (USAID) ֆինանսավորած «Հաշմանդամություն ունեցող անձանց կենսամակարդակի բարելավում` զբաղվածության խթանման միջոցով» (LIFE) ծրագրով 2012թ.-ից հաշմանդամություն ունեցող 543 անձ ապահովվել է մշտական աշխատանքով:
Արտակարգ իրավիճակների նախարարությունը պետական համակարգի առաջին հիմնարկն է, որն աշխատանքի է ընդունել հաշմանդամություն ունեցող անձանց: Այսօր «Life» ծրագրի ամփոփիչ աշխատաժողովի ընթացքում ԱԻՆ փրկարար ծառայության տնօրենի տեղակալ Նիկոլայ Գրիգորյանը տեղեկացրեց, որ նախարարությունում աշխատում է սայլակով տեղաշարժվող 35 աշխատակից. «Նրանք ներգրավված են Ճգնաժամային կառավարման ազգային կենտրոնում, որը գործում է նաեւ բոլոր մարզերում: Աղետների ռիսկերի գնահատման ազգային պլատֆորմում ստեղծեցինք խումբ` քննարկելով հաշմանդամություն ունեցողներին աշխատանքի ընդունելու հարցը»,-լրագրողների հետ զրույցում ասաց Գրիգորյանը:
Նա նշեց, որ «Life» ծրագրով ԱԻՆ-ն ապահովվել է վերելակով, եւ հաշմանդամություն ունեցող աշխատակիցները կարողանում են օգտվել նաեւ սպորտդահլիճից. «Նրանք մասնակցել են կարատեի մրցումների: Թվում է, թե ճապոնական կարատեն եւ հաշմանդամները հեռու են իրարից, բայց այսօր դա իրականություն է: Նաեւ բասկետբոլի մրցումների են մասնակցում: Նրանք կարող են եւ ունակ են, նրանց ուժերը հնարավոր է օգտագործել: Նայեք նրանց աչքերին` այնպես են փայլում…»:
Նիկոլայ Գրիգորյանը հիշեցրեց, որ մինչ աշխատանքի անցնելը հաշմանդամություն ունեցողների համար կազմակերպվել են լեզուների ուսուցման եւ մասնագիտական հմտությունների դասընթացներ:
Կարդացեք նաև
Լուիզա ՍՈՒՔԻԱՍՅԱՆ
