90-ականներին ՀՀՇ-ի իշխանության ժամանակ ՀՀ-ում քաղբանտարկյալներ եղե՞լ են, թե՞ ոչ: ՀՅԴ-ականները քաղբանտարկյա՞լ էին: Այս հարցին այսօր ԱԺ ճեպազրույցների ժամանակ «Ժառանգության» պատգամավոր Զարուհի Փոստանջյանը պատասխանեց, որ անկախության օրվանից սկսած՝ ունեցել ենք քաղբանտարկյալներ. «Շատ եմ ցավում, որ քաղաքական հայացքների համար նախկին հետապնդվողները այսօր իրենց հետապնդողին ողջունեցին: Սա շատ ցավալի է: Մինչեւ վերջ պետք է պայքարը տանել եւ հասնել համակարգի փոփոխության, այլ ոչ թե ժամանակը անցնի, դու էլ փոխվես եւ դառնաս այդ ճնշող համակարգի մի մասը»:
Զարուհի Փոստանջյանը նկատի ուներ Նիկոլ Փաշինյանին, Ալեքսանդր Արզումանյանին եւ Գագիկ Ջհանգիրյանին. «Բոլորը ողջունեցին Թաթոյանին՝ հիմնավորմամբ, թե իբր նա կապ չի ունեցել Մարտի 1-ի գործերի հետ: Փորձում էին մոլորեցնել հանրությանը: Եթե դու շարունակում ես նույն քաղաքականությունը, մարդու իրավունքների եվրոպական դատարանում իշխանություններին ես ներկայացնում՝ անկախ նրանից, թե այդ փաստաթուղթը դու չես ուղարկել՝ դու նույն քաղաքականությունն ես սպասարկել»:
Հարցին՝ Արման Թաթոյանի առաջին գործը եղավ Վարդգես Գասպարիի հետ կապված ուսումնասիրություն կատարելը եւ նաեւ հայտարարությունը օմբուդսմենի, դա ձեզ բավարարո՞ւմ է: Զարուհի Փոստանջյանը պատասխանեց. «Իհարկե, ոչ»:
Մեր հարցին՝ ի՞նչ պետք է աներ, որ չի արել, ի՞նչ կարող էր անել՝ նա պատասխանեց «Անձամբ ինքը պետք է նախ գնար: Եթե դու ստանձնում ես մի պաշտոն եւ կա ահազանք ՔԿՀ-ում կտտանքների վերաբերյալ, առաջին քո քայլը դա պետք է լիներ, այլ ոչ թե քո աշխատակիցներին ուղարկեիր: Դու ինքդ պետք է տեսնես, զգաս, թե ինչ է տեղի ունեցել»:
Կարդացեք նաև
Հռիփսիմե ՋԵԲԵՋՅԱՆ
