‹‹Երեկ՝ փետրվարի 24-ին, ՀՀԿ-ի և ՀՅԴ-ի միջև կնքված համաձայնագիրը քաղաքական առումով բավականին երկարատև գործունեության և ՀՀԿ-ՀՅԴ երկխոսության արդյունքում ծնված քաղաքական խորքային համաձայնագիր է: Այն բավականին մանրակրկիտ ձևով անդրադառնալու է տարբեր ոլորտների՝ դատական, տեղական ինքնակառավարման մարմինների գործունեության բարեփոխումներին և նոր Սահմանադրությամբ պահանջվող բոլոր այն նորարարություններին, որոնք արդեն իսկ հրամայական են իրավական դաշտում››,- այսօր «Արմենպրեսի» ակումբում լրագրողների հետ հանդիպման ժամանակ ասաց ԱԺ պատգամավոր Արտակ Զաքարյանը:
Ըստ Արտակ Զաքարյանի՝ այս կոալիցիան յուրովի է այնքանով, որ իշխող քաղաքական ուժը չուներ կոալիցիա կազմելու անհրաժեշտություն մեծամասնություն ձևավորելու առումով, բայց երկրում ստեղծված խնդիրները, իրավիճակները, անընդհատ տեղի ունեցող փոփոխությունները և նոր մարտահրավերների հավանականությունը բերում են կայացած քաղաքական ուժերի երկարատև համագործակցության անհրաժեշտության:
‹‹ՀՅԴ-ն լավ գործընկեր կարող է լինել, քանի որ երկար ժամանակ քաղաքական կյանքում իր ուրույն ձեռագիրն է ունեցել, իսկ Հանրապետականի դերակատարությունը առանցքային և դոմինանտ է մեր պետության քաղաքական համակարգում, հետևաբար այս կոալիցիան պետք է դիտել նաև որպես պետության կայուն զարգացման համար կարևոր քաղաքական երաշխիք››,-նշեց պատգամավորը՝ հույս հայտնելով, որ սա և՛ Հանրապետականի համար, և՛ Դաշնակցության համար պատասխանատվության նոր փուլ է ենթադրում, նոր երաշխիքներ բերում քաղաքացուն, պետությանը, զինվորին:
Նա շեշտեց, որ Դաշնակցությունը, ամբողջական պատասխանատվություն ստանձնելով, ստանձնեց այն գերատեսչությունների և ճյուղային ոլորտների ղեկավարման պատասխանատվությունը, որոնք նպատակահարմար է գտել, իհարկե, ունենալով Հանրապետական կուսակցության համաձայնությունը:
Կարդացեք նաև
‹‹Այս կոալիցիան առանձնահատուկ է նաև նրանով, որ անկախ չափսից, անկախ մասնակցության ձևաչափից Դաշնակցությունը ստանձնում է ամբողջական պատասխանատվություն նաև տրանսպորտի ոլորտի, սոցիալական ոլորտի համար այնպես, ինչպես Հանրապետական կուսակցությունը պատասխանատու է կրթության, տարածքային կառավարման ոլորտների համար››,-հավելեց Արտակ Զաքարյանը:
Նունե ՂԱԶԱՐՅԱՆ
