Այսօր խորհրդարան էին եկել խաղաղ պայմաններում զոհված զինվորների մայրերը:
Հիշեցնենք, վերջերս նրանց էր տրամադրվել ծավալուն տեղեկանքը, որը պատգամավորները ստացել էին տարբեր գերատեսչություններին ուղղված իրենց հարցերին ի պատասխան: Զոհվածների ծնողները փաստաբանների հետ ուսումնասիրել են տեղեկանքը եւ բազմաթիվ անճշտություններ են հայտնաբերել:
ԱԺ պետաիրավական հարցերի մշտական հանձնաժողովի նախագահի օգնականը զոհվածների մայրերին հորդորել է բոլոր անճշտությունները առանձնացնել եւ իրենց դիտողություններով ներկայացնել հանձնաժողովին:
«Ես կարծում եմ, որ սա հարցը ձգձգել-երկարացնելու մի ձեւ է»,- Aravot.am-ի հետ զրույցում ասաց 2007 թվականին սպանված Տիգրան Օհանջանյանի մայրը` Գոհար Սարգսյանը` հավելելով, որ նախորդ գումարման խորհրդարանում այս ճանապարհն իրենք արդեն անցել են:
Կարդացեք նաև
Ծնողների պահանջն էր, որպեսզի խորհրդարանական հանձնաժողով ստեղծվի, որը կուսումնասիրի քրեական գործերը: «Միայն վճիռները որ կարդան`ամենն արդեն պարզ կլինի: Ինը տարի քննության արդյունքում, գործը կասեցրել`շպրտել են երեսիս, հանցագործության գործիքն է կորել, սա չի բացահայտվում, նա չի բացահայտվում եւ այլն»,- իր վրդովմունքը փոխանցեց տիկին Գոհարը:
Ամեն դեպքում, զոհվածների մայրերը տեղեկանքում առկա անճշտությունները ներկայացնելու են հանձնաժողովին եւ փորձելու են հասնել նրան, որ այս հարցով խորհրդարանական հանձնաժողով ստեղծվի:
ԱԺ պետաիրավական հարցերի մշտական հանձնաժողովի նախագահ Հովհաննես Սահակյանն Aravot.am-ի հետ զրույցում ասաց, որ հարցը դեռ ընթացքի մեջ է, այս պահին նորություններ դեռ չկան:
Նելլի ԳՐԻԳՈՐՅԱՆ
