Տարադրամի փոխանակման կետերի վրա ավազակային հարձակումներ կատարած, աշխատակիցներից մեկի սպանության գործով, որը հայտնի է «Բանդա-2» անվամբ, ինչպես տեղեկացրել էինք, անջատվել էր Ռաֆայել Հարոյանի, Հայկ Կոջոյանի, Տիգրան Հովհաննիսյանի եւ Կարեն Վարդանյանի մասը:
Դատավոր Արշակ Վարդանյանի նախագահությամբ այսօր շարունակված անջատված մասի քննության ժամանակ դատարան չբերվեց Տիգրան Հովհաննիսյանը, քանի որ դատարանը սանկցիա էր կիրառել նրա նկատմամբ՝ հեռացնելով նիստերի դահլիճից:
Դատարան հրավիրված Արտաշես Խաչատրյանը հրավիրվել էր ամբաստանյալ Հայկ Կոջոյանի պաշտպան Արմեն Ֆերոյանի միջնորդությամբ եւ նա պետք է պատասխաներ այն հարցին, թե արդյոք Հայկ Կոջոյանի մարմնի վնասվածքները հրազենայի՞ն են, ինչպես նշել էր փորձագետը իր եզրակացության մեջ, թե՞ «կենցաղային» է՝ այլ իրի, առարկայի կողմից պատճառված:
Կարդացեք նաև
Խոսքը մի դրվագ ճշտելու մասին է. ըստ մեղադրական եզրակացության՝ «չենջի» աշխատակցին սպանելուց հետո ամբաստանյալ Կարեն Վարդանյանը անզգուշաբար հրազենով վնասել էր ընկերոջը, ինչը պաշտպանական կողմը չի ընդունում, ասելով, թե հրազենային վնասվածք չի ստացել Հայկը եւ այն եղել է այլ ժամանակահատվածում:
Նիստի ժամանակ երկու անգամ նախազգուշացվեց Ռաֆայել Հարոյանը, որին մեղադրում են կազմակերպված հանցավոր խումբ՝ բանդա ստեղծելու մեջ:
Նիստի մանրամասները՝ վաղվա «Առավոտ» օրաթերթում:
Ռուզան ՄԻՆԱՍՅԱՆ
