«Առողջապահության համաշխարհային կազմակերպության, Եվրամիության երկրներում, ինչպես նաեւ Ամերիկայի Միացյալ Նահանգներում եւ աշխարհի գրեթե բոլոր երկրներում «նարկոման» եւ «նարկոմանիա» տերմինները չեն կիրառվում: «Նարկոմանիա» տերմինը կիրառվել է միայն ԽՍՀՄ-ում, ապա Ռուսաստանում եւ որպես ժառանգություն նաեւ Հայաստանում»,- այս մասին այսօր հայտարարեց փորձագետ Սուրեն Նազինյանը:
Հելսինկյան քաղաքացիական ասամբլեայի Վանաձորի գրասենյակն այսօր հրավիրել էր «Թմրամիջոցներ գործածող անձանց նկատմամբ իրականացնող քաղաքականության հիմնախնդիրները Հայաստանում: Հիմնական թերությունների վերհանումը եւ բարեփոխումների անհրաժեշտությունը» թեմայով քննարկում, որի ընթացքում ներկայացվեց համանուն հետազոտությունը:
Հետազոտության հեղինակ Սուրեն Նազինյանը նշեց, որ Ռուսաստանի կառավարության որոշմամբ անցյալ տարի «նարկոման» եզրույթը հանվեց. «Եվրամիության երկրներում, ԱՄՆ-ում եւ միջազգային կազմակերպություններում գործածվում են «թմրամիջոցից կախվածություն», «թմրամիջոցի նկատմամբ հակում» եւ «թմրամիջոցի չարաշահում» տերմինները: Սրանք անձի բնորոշման համար չեն գործածվում եւ նախատեսված են հիվանդության ախտանիշն արձանագրելու համար»:
Կարդացեք նաև
Խոսելով Հայաստանում թմրամիջոցներ գործածող անձանց նկատմամբ խարանի եւ խտրական վերաբերմունքի մասին՝ փորձագետն ասաց, թե Հայաստանի հասարակությունում նման մարդկանց չեն վերաբերվում որպես հիվանդների. «Արհամարհանք, անտարբերություն, մեղադրանք, ատելություն. մարդկանց ոչնչացնող վերաբերմունք կա: Այսպիսի վերաբերմունքը բերում է նրան, որ թմրամիջոցից կախվածություն ունեցող անձինք ուղղակի մեկուսանում են, իրենց խնդիրների մասին չեն բարձրաձայնում: Դա բերում է նրան, որ նրանք առողջապահական մարմիններին չեն դիմում եւ ժամանակի հետ կործանվում են»:
Թմրանյութից կախվածություն ունեցող անձանց թմրամոլներ անվանելը Սուրեն Նազինյանը համեմատեց շաքարային դիաբետով հիվանդ մարդկանց «դիաբետիկներ», սրտային հիվանդություններ ունեցողներին «սրտայիններ», տուբերկուլյոզով հիվանդներին «թոքախտավորներ» անվանելու հետ:
Աշոտ ԻՍՐԱԵԼՅԱՆ
