«Նրանք ցանկանում են բավականին ճղճիմ գործարքին տալ մի քիչ ավելի վեհ տեսք, իբրև թե այդ ամենն արվում է ժողովրդավարացման, գաղափարների և կոռուպցիայի դեմ պայքարի համար: Սակայն նման խոստումներ են տալիս են այն ուժերը, որոնք արդեն իսկ մի քանի անգամ խախտել են և ցույց են տվել, որ ամենակոռումպացված և ամենաոչ ժողովրդավարական ուժերն են ՀՀ պատմության մեջ»,- այսօր խորհրդարանում լրագրողների հետ զրույցում ասաց ՀԱԿ խմբակցության ղեկավար Լեւոն Զուրաբյանն`անդրադառնալով ՀՅԴ-ՀՀԿ երեկ ստորագրած համագործակցության հուշագրին:
Անդրադառնալով հուշագրի կետերի բովանդակությանը, Լեւոն Զուրաբյանն ասաց, որ լուրջ չի հուշագրի այն կետը, որով նախատեսվում է բիզնեսն անջատել քաղաքական իշխանությունից: Լեւոն Զուրաբյանի կարծիքով, ՀՅԴ-ն այն ուժը չէ, որ կարողանա նման փոփոխություն անել. «Ինչի՞, Դաշնակցությունը բիզնեսով չի՞ զբաղվում, այսինքն՝ մենք չգիտենք` ի՞նչ բիզնեսներ են հովանավորում, չգիտենք` ինչո՞վ են նրանք զբաղված: Երկու ուժերի մոտեցումների մեջ այս հարցում ես տարբերություն չեմ տեսնում, քանի որ ասվածն ընդամենը «ֆրազներ» են, և եթե խորհրդարանի 70 տոկոսը խախտում է Սահմանադրությունն, ապա զարմանալի է, որ Դաշնակցությունը Սահմանադրություն խախտող իշխանության հետ կարող է մտնել կոալիցիայի մեջ»:
Այն, որ հուշագիրը ստորագրեցին ՀՅԴ Հայաստանի Գերագույն մարմնի ներկայացուցիչ Աղվան Վարդանյանը և ՀՀԿ փոխնախագահ Արմեն Աշոտյանը, մինչդեռ ԱԺ ՀՅԴ խմբակցության ղեկավար Արմեն Ռուստամյանը հայտարարել էր, որ հուշագիրը կստորագրեն Աղվան Վարդանյանը եւ Սերժ Սարգսյանը, Լեւոն Զուրաբյանն ասում է. «Շատ դժվար է բացատրել, թե բեմադրիչների մտքով ինչ է անցել, հնարավոր է, որ պարզապես Աշոտյանի դեմքի փրկության հնարավորություն է տրվել, որ իբրև իր ստորագրությամբ և հոժար կամքով հրաժարվում է նախարարի պաշտոնից: Ինչ-որ մի բան իրենց մտքով անցել է»:
Նելլի ԳՐԻԳՈՐՅԱՆ
