ԱԺ-ում քննարկվում է Հանրային ծառայությունները կարգավորող հանձնաժողովի 2016-ի գործունեության ծրագիրը:
ՀՀԿ պատգամավոր Ռուզաննա Մուրադյանը հարցրեց՝ ո՞ր դեպքերում ՀԷՑ-ն իրավունք ունի դադարեցնել սպառողի էլեկտրամատակարարումը, եւ պարտքի առկայության դեպքում մատակարարը ե՞րբ չպետք է դադարեցնի սպառողի էլեկտրամատակարարումը:
Հանձնաժողովի նախագահ Ռոբերտ Նազարյանը պատասխանեց. «Մատակարարման կանոնները հրապարակված են, օրինակելի պայմանագրի ձեւ կա, մեր կայքում բոլոր հարցերի պատասխանները կան»: Նա հորդորեց, որ եթե քաղաքացիները կասկած ունեն՝ դիմեն հանձնաժողով:
ՀԱԿ խմբակցության պատգամավոր Գագիկ Ջհանգիրյանն էլ հետաքրքրվեց. «Մենք այդպես էլ չիմացանք՝ Որոտանի ՀԷՅ-ը վաճառվե՞ց, թե՞ ոչ»: Ռոբերտ Նազարյանը պատասխանեց. «Իհարկե, վաճառվել է: Կառավարությունը համապատասխան որոշում ունի, նույնիսկ գումարի մի մասն էլ արդեն ստացել են»:
Կարդացեք նաև
Ջհանգիրյանը հարցրեց՝ այստեղ կառավարության տարբեր պաշտոնյաներ էներգետիկայի ոլորտի հետ կապված տարբեր խնդիրներ քննարկելիս միշտ ասում են, թե բանակցում են տարբեր երկրների հետ՝ գազի մատակարարման վերաբերյալ: «Գազպրոմի» հետ 2013-ի դեկտեմբերի մոնոպոլ պայմանագրերի ստորագրումից եւ վավերացումից հետո մեր պաշտոնյաներն իրականում կարո՞ղ են բանակցել որեւէ ածխաջրածին գնելու համար, եթե վաճառողը «Գազպրոմը» չէ: Օրինակ գազ կարո՞ղ ենք գնել Իրանից:
Ռոբերտ Նազարյանը վստահեցրեց, թե եթե մեկը ավելի լավ պայմաններով, ավելի էժան գազ մեզ մատակարարի՝ մենք կօգտվենք այդ հնարավորությունից՝ անկախ «Գազպրոմի» հետ կնքած համաձայնագրից: Գագիկ Ջհանգիրյանը կասկածեց, որ կարող ենք:
Հռիփսիմե ՋԵԲԵՋՅԱՆ
