Եվրոպայի խորհուրդը կոչ է անում Հայաստանին քայլեր ձեռնարկել խորհրդարանականների, դատավորների և դատախազների կողմից կոռուպցիան կանխելու համար: Այս մասին ասվում է այսօր Եվրոպական խորհրդի Կոռուպցիայի դեմ պայքարի պետությունների խմբի (Council of Europe’s Group of States against Corruption (GRECO)) կողմից հրապարակված զեկույցում:
Զեկույցում նշվում է, որ կոռուպցիան լուրջ խնդիր է մնում Հայաստանի հասարակության համար, չնայած որ տարիներ շարունակ դրա դեմ պայքարը եղել է քաղաքական օրակարգում:
Հայաստանում դատական համակարգը հակված է կոռուպցիային և անկախ չէ: Մտահոգություններ կան նաև՝ կապված ուժերի բաժանման բացակայության, խորհրդարանի թուլության և հանրային որոշումների կայացման հարցում ոչ բավարար թափանցիկության հետ:
«Հայաստանի ներկայիս իշխանությունների պետական համակարգի և հանրային կառավարման հարցում մտահոգությունները պետք է դիտակել համապարփակ և ամբողջական բարեփոխումների գործընթացին զուգահեռ,- ասել է Եվրոպայի խորհրդի գլխավոր քարտուղար Թորբյորն Յագլանդը:-Բարեփոխումներին պետք է հետևել վճռականությամբ և առանց հապաղելու: Կոռուպցիայի դեմ պայքարը առաջնահերթություն է: Մենք պատրաստ ենք աջակցել Հայաստանին այս գործընթացում և վստահ ենք, որ իշխանությունները հաշվի կառնեն մեր խորհուրդները»:
Կարդացեք նաև
Մասնավորապես, GRECO-ն խորհուրդ է տալիս, որ խորհրդականների, դատավորների և դատախազների կողմից նվերներ ընդունելու կանոնները, դրանց նկատմամբ վերահսկողությունը հետագայում մշակվեն և ավելի արդյունավետ դառնան: Բացի այդ, խորհուրդ է տրվում թափանցիկություն ապահովել խորհրդարանական գործընթացներում, վարվեցողության կանոններ ընդունել խորհրդարանականների համար, կանխել նրանց կողմից բիզնես գործունեության մեջ մեքենայությունները:
Դատավորների և դատախազների, այդ թվում գլխավոր դատախազի ներկայիս ընտրության և ազատման գործընթացները, ինչպես նաև դիսցիպլինար գործընթացներ պետք է կարգավորվեն: Դատավորների և դատախազների վրա ազդելու, ինչպես նաև դատական գործընթացներում կոռուպցիայի դեպքերը պետք է կանխվեն, ասվում է զեկույցում:
Մինչև 2017թ. ապրիլ Հայաստանի իշխանությունները պետք է հաշվետվություն ներկայացնեն, թե ինչ քայլեր են ձեռնարկվել զեկույցում ներառված 17 խորհուրդները կյանքի կոչելու համար: GRECO-ն կգնահատի այդ քայլերի արդյունավետությունը 2017թ. կեսերին հրապարակված նոր զեկույցով:
Պատրաստեց՝ Վիկտորյա ԱՆԴՐԵԱՍՅԱՆԸ
