Ավան եւ Նոր Նորք վարչական շրջանների ընդհանուր իրավասության առաջին դատարանում փետրվարի 25-ին դատավոր Դավիթ Հարությունյանը (լուսանկարում) հրապարակեց Մանե Թանդիլյանի փոխարեն քվեարկելու մեջ մեղադրվող մանկապարտեզի տնօրեն Կարինե Ստեփանյանի գործով դատական վճիռը:
Դատարանը մեղավոր ճանաչեց Կարինե Ստեփանյանին եւ որպես պատիժ նրա նկատմամբ նշանակեց տուգանք 500 հազար դրամի չափով: Նկատենք, որ գործով մեղադրողը միջնորդել էր տուգանել նրան 600 հազար դրամի չափով:
Հիշեցնենք, 2015 թվականի դեկտեմբերի 6-ին կայացած սահմանադրական բարեփոխումներից հետո, Երևան քաղաքի Ավան-Առինջ թաղ. թիվ 56 մանկապարտեզում տեղակայված 1/07 ընտրատեղամասի հանձնաժողովի անդամ, նույն մանկապարտեզի տնօրեն Կարինե Ստեփանյանին մեղադրանք էր առաջադրվել` Երևան քաղաքի Ավան-Առինջ 2/13 շենքի թիվ 18 բնակարանում հաշվառված Մանե Վանյայի Թանդիլյանի տվյալների դիմաց գրառում կատարելու եւ նրա փոխարեն քվեարկելու համար:
Ամի ՉԻՉԱԿՅԱՆ
