ՀՀԿ-ի հետ քաղաքական համագործակցությունից ՀՅԴ-ն կարողացավ կորզել Սերժ Սարգսյանի ծրագրային ելույթը: Այս կարծիքին է «Միջազգային և անվտանգության հարցերի հայկական ինստիտուտի» հիմնադիր նախագահ, քաղաքական վերլուծաբան Ստյոպա Սաֆարյանը:
Նրա մեկնաբանմամբ, Սերժ Սարգսյանի ելույթը նաեւ խաղի կանոններն էին, որոնք հնչեցին հենց կոալիցիայի կազմավորումից առաջ. «Լավ իմանալով ՀՀԿ-ի առաջադրած պայմանները, չեմ կարծում, որ խոսքը հավասար համագործակցության մասին է: Նախկին կոալիցիաները՝ 2011, 2012 թվականներին կազմավորված, նույնիսկ դրանից առաջ, այդ բոլոր կոալիցիաներում եղել են ստվերային պայմանավորվածություններ, իսկ այս անգամ մինչ պայմանավորվածությունները հրապարակային կդարձնեին, Սերժ Սարգսյանը հրապարակեց խաղի կանոնները, թե ինչպես է ինքը տեսնում տարբեր ոլորտների շեշտադրումները, ինչպես է տեսնում իշխանության մեջ գտնվող մարդու կերպարը: Չեմ ասում, թե ՀՀԿ-ն ատամներով պահելու է հենց այդ չափանիշները, բայց ՀՅԴ-իր համար հիմք է ստեղծել, որ ասի՝ սա է խաղի կանոնները, իշխանության մեջ այս ինչ մարդը չի համապատասխանում այս ինչ չափանիշին:
ՀՀԿ-ի լայն մեկնաբանության դաշտը նեղացվել է: Կարող ենք ասել, որ խաղի կանոններն ամրագրված են Սերժ Սարգսյանի ելույթում ու դրանք ոչ այնքան ՀՀԿ-ի խաղի կանոններն են, որքան Սերժ Սարգսյանի խաղի կանոններն են: Պետք նկատի ունենանք, որ բանակցություններն էլ տեղի են ունեցել Սերժ Սարգսյանի ու Հրանտ Մարգարյանի մակարդակով, դրանք անձերի մակարդակով ձեռք բերված պայմանավորվածություններ են ու խաղի կանոններ:
Չեմ ուզում ասել, որ չենք ունենալու նախկին կոալիցիաների ճակատագիրը, բայց մենք ունենք նախկին կոալիցիաներից մի տարբերություն, որ մինչեւ կոալիցիա կազմավորելը հրապարակվում են խաղի կանոնները: Ինչպես կօգտագործի ՀՅԴ-ն, դա իրենից է կախված: Եթե սա համարում են հանրությանը ներկայացված մի գեղեցիկ տեքստ, որն ընդամենը լեգիտիմացնում է այս պայմանավորվածությունները, իհարկե, կունենանք նախկին կոալիցիաների ճակատագիրը: ՀՀԿ-ն կրկին կասի՝ կամ մի քննադատեք, կամ ձայններդ կտրեք եւ կրեք պատասխանատվությունը: Մենք հիշում ենք նախկին բազարները: Բայց հիմա կան խաղի կանոններ, որոնք այնքան էլ վատը չեն, եթե ՀՅԴ–ն ուզենա օգտագործել դա ու պարտադրել, որ այդ կանոններով խաղա ոչ միայն ինքը այլեւ հենց ՀՀԿ-ն»:
Կարդացեք նաև
Ստյոպա Սաֆարյանի կարծիքով, եթե ՀՅԴ-ն չի ուզում դառնալ իշխանության գործիք կամ կրտսեր գործընկեր, պետք է խաղա խաղի այդ կանոններով. «Իշխող կուսակցությունը մի քայլ առաջ անցած սկսել է համաձայնությունների կայացումը, այդ կտրվածքով արդեն իսկ բոլոր հնարավոր հարցերի շուրջ պայմանավորվածություններ ձեռք բերվել են քաղաքական ուժերի միջեւ: Այսօր կարող ենք ասել, որ ձեւավորվել է ապագա իշխանության երկու հենասյուներ՝ ՀՀԿ եւ ՀՅԴ… Բայց ինչպես Սերժ Սարգսյանն իր վերջին ելույթում ասաց` դրանով չի ավարտվելու այն ուժերի շրջանակը, ովքեր կանգնելու են ապագա իշխանության հիմքը»:
Արփինե ՍԻՄՈՆՅԱՆ
