Այսօր ԱԺ-կառավարություն հարցուպատասխանի ժամանակ ՀՀԿ պատգամավոր Ռուզաննա Մուրադյանը ԿԳ նախարար Արմեն Աշոտյանին հարց ուղղեց դպրոցների վարկանշավորման մասին ցուցակների մասին, որը մի շարք հարցադրումների տեղիք է տվել. «Ըստ ուսուցիչների, տնօրենների, տեսչության ստուգումների արդյունքում իրենց դպրոցի ցուցանիշները շատ ավելի բարձր էին, բայց վարկանշավորման արդյունքում ցածր արդյունք են գրանցել»:
Պատգամավորը հարցրեց՝ տեսչավորում, վարկանշավորումն իրար հետ կապ ունե՞ն, տեսչավորման արդյունքը վարկանշավորման համար հի՞մք է, թե՞ ոչ:
Կրթության եւ գիտության նախարար Արմեն Աշոտյանը պատասխանեց. «Որպես գործիք՝ վարկանշավորումը լավագույններից է համարվում՝ համակարգի հանդեպ հանրության վստահության բարձրացման տեսակետից: Եթե ինչ-որ մի դպրոց, որը նախկինում իրեն համարում էր շատ լավը, կամ ինչ-որ մի տնօրեն, որ մի քիչ ավելի ծանոթ մարդ ուներ, կամ մեծ համբավ ուներ շրջապատում, հանկարծ իր դպրոցը չի տեսնում 10, 20, 30 դպրոցների շարքում, դա չի նշանակում, որ մենք խաթարել ենք այդ տնօրենի մանկության երազանքը: Դա նշանակում է, որ մենք հաշվել ենք եւ տնօրենին քարտեր ենք տվել շուրջ 60 ցուցանիշով, որպեսզի նա հասկանա, թե դպրոցը որտեղ է կաղում: Այդ համակարգը գերազանցիկների հայտագրման համակարգ չէ, այն ախտորոշիչ համակարգ է, որը խելացի կիրառման դեպքում շատ օգտակար կարող է լինել տնօրենների համար»:
Ռուզաննա Մուրադյանը գովեստի խոսքեր ասաց նախարարին՝ նշելով, թե «Ձեր վերջին խոսքը պետք է դառնա այն հենքը, որից մենք տեսչավորման եւ վարկանշավորման գործընթացի մեջ ձեր մեթոդաբանությունը լավացնելու ճանապարհով հաստատենք հստակ կարգ»:
Կարդացեք նաև
Արմեն Աշոտյանը պատասխանեց «Ինչ վերաբերում է վերջին խոսքին, ասում են, եթե ուզում ես զվարճացնել Աստծուն, պատմիր իրեն քո պլանների մասին: Չեմ ուզում զվարճացնել: Վստահաբար կարծում եմ, որ սա վերջին խոսքիս համար ճիշտ տարիք չէ»:
Որպես հետգրություն՝ նա շնորհակալություն հայտնեց ԱԺ պատգամավորներին, լրագրողներին:
ԱԺ փոխխոսնակ Հերմինե Նաղդալյանն արձագանքեց՝ Ի՞նչ վերջին խոսք, պարոն նախարար, սա նոր սկիզբ է:
Հռիփսիմե ՋԵԲԵՋՅԱՆ
