Այս պահին Արաբկիրի եւ Քանաքեռ- Զեյթունի վարչական շրջանների ընդհանուր իրավասության դատարանում քննվում է Գեւորգ Սաֆարյանի կալանքի ժամկետը երկարաձգելու հարցը:
Քիչ առաջ դատարանից դուրս եկած քաղբանտարկյալի փաստաբան Տիգրան Հայրապետյանը դատարանի մոտ հավաքվածներին ներկայացրեց, որ քննությունը դեռ չի ավարտվել, դատարանը գնացել է խորհրդակցության: Նա արդեն դատարանին ներկայացրել է որոշ հարցեր, որոնց պատասխանները չի ստացել: Նշեց, որ իրենց համար տարօրինակ է այն հանգամանքը, թե ինչու է կալանքի հարցը քննվում Արաբկիրի եւ Քանաքեռ Զեյթունի վարչական շրջանների ընդհանուր իրավասության դատարանում, երբ ենթադրյալ հանցագործությունը տեղի է ունեցել Կենտրոն վարչական շրջանում, ինչպես նաեւ՝ կալանքը որպես խափանման միջոց ընտրելու միջնորդությունն է քննվել Կենտրոն վարչական շրջանի դատարանում: «Հիմա երբ Կենտրոն վարչական շրջանն է քննել կալանքի հարցը, անտրամաբանական է. թե ինչո՞ւ է Արաբկիրի վարչական շրջանում քննվում կալանքը երկարաձգելու միջնորդությունը»,- ասաց պարոն Հայրապետյանը:
Նա նշեց, որ ինքը դատարանին հարց է ուղղել, թե հարյուրավոր դատական գործերից քանիսի դեպքում է քննիչի կողմից ներկայացված միջնորդությունը դատարանը մերժել: Այս հարցի պատասխանը, ըստ փաստաբանի, դատարանը եւս չուներ:
Կարդացեք նաև
«Հարց եղավ նաեւ, ինչու՞ է գործը դռնփակ քննվում»,- ասաց պարոն Հայրապետյանը՝ նշելով, որ առաջին ատյանի դատարանի դեպքում դատարանը պարտավոր է հիմնավորել, թե ինչու է գործը դռնփակ քննվում:
«Մենք մտածում ենք, որ նախագահող դատավորը որեւէ վերաբերմունք ունի քննչական մարմնի նկատմամբ, և, հետևաբար այդ վերաբերմունքը ազդել է դատավորի միջնորդությունը վարույթ ընդունելու եւ գործը քննելու համար: Մենք հայտնել ենք ինքնաբացարկի միջնորդությունը: Հիմա դատարանը դա է քննում»,- ասաց պարոն Հայրապետյանը:
Հռիփսիմե ՀՈՎՀԱՆՆԻՍՅԱՆ
