Ջրօգտագործողների ընկերությունների ֆինանսական ճեղքվածքը մարելու նպատակով կառավարությունը 799 միլիոն դրամ կհատկացնի: Ջրօգտագործողների ընկերությունները պարտք են «Հայաստանի էլեկտրական ցանցեր»-ին (ՀԷՑ)՝ սպառած էլեկտրաէներգիայի դիմաց:
Գումարը կհատկացվի 2016 թվականի պետական բյուջեով նախատեսված «Ոռոգման ծառայություններ մատուցող ընկերություններին ֆինանսական աջակցության տրամադրում» ծրագրով սահմանված գումարից: Ինչպես տեղեկանում ենք կառավարության` վաղվա` փետրվարի 25-ի նիստի օրակարգից, ջրօգտագործողների ընկերությունների անունից «Հայաստանի էլեկտրական ցանցեր» փակ բաժնետիրական ընկերությանը կառավարությունը կվճարի 609,209.73 հազ. դրամ՝ օգտագործած էլեկտրաէներգիայի դիմաց առաջացած պարտավորությունները մարելու նպատակով: Ջրօգտագործողների ընկերությունների փոխարեն եւ նրանց անունից «Սեւան-Հրազդանյան-ջրառ» եւ «Ախուրյան-Արաքս-ջրառ» փակ բաժնետիրական ընկերություններին կվճարի 1,447,700.0 հազ. դրամ՝ ոռոգման ջրի դիմաց առաջացած պարտավորությունները մարելու նպատակով:
Կառավարությունն իր այդ որոշումը պատճառաբանում է, որ ջրօգտագործողների ընկերություններին ՀՀ պետական բյուջեով հատկացվող սուբսիդիաները հիմնականում տրվում են վերջիններիս ընթացիկ գործունեությունը ժամանակին եւ պատշաճ կազմակերպելու, ինչպես նաեւ ֆինանսական ճեղքվածքները մարելու նպատակով:
Լուսինե ԲՈՒԴԱՂՅԱՆ
