Երեւանի քաղաքապետարանը Երեւան քաղաքի գլխավոր պողոտայի Աբովյան, Փավստոս Բուզանդի, Եզնիկ Կողբացու եւ Արամի փողոցներով պարփակված տարածքները հանուն գերակա շահի կիրացնի` հիմք ընդունելով Երեւան քաղաքի գլխավոր հատակագիծն ու դրա հիման վրա առաջացած քաղաքի զարգացման հեռանկարները եւ Երեւան քաղաքի Կենտրոն վարչական շրջանի գոտեւորման նախագիծը:
Թե քանի ընտանիք ու քաղաքացի կրկին կտուժի կառուցապատողների գործողություններից, արդյոք պատշաճ կփոխհատուցվեն ու այս քաղաքացիներն էլ չեն համալրի իրացման գոտու մյուս բնակիչների շարքերը, որոնք գրեթե ամեն հինգշաբթի, կառավարության նիստի օրերին բողոքի ակցիաներ են անում` կառավարությունից պահանջելով փոխհատուցում, կանդրադառնանք առաջիկայում:
Փետրվարի 25-ին կայանալիք կառավարության նիստում Երեւանի քաղաքապետ Տարոն Մարգարյանը վարչապետին նշյալ տարածքների իրացումը կպատճառաբանի
հին Երեւանի պատմաճարտարապետական միջավայրը վերականգնելու հանգամանքով: Ըստ Տարոն Մարգարյանի «Երեւանի կենտրոնից կվերանա կիսախարխուլ, ոչ սեյսմակայուն, տարերայնորեն տեղակայված եւ հիմնականում վթարային բնակելի ֆոնդը, որի փոխարեն հնարավոր կլինի տարածքում, հին Երեւանի պատմաճարտարապետական միջավայրը»:
Կարդացեք նաև
Ըստ որոշման նախագծի, որը կներկայացվի նիստում քաղաքապետն ասում է. «Համաձայն Երեւան քաղաքի գլխավոր հատակագծի եւ Կենտրոն վարչական շրջանի համաձայնեցված գոտեւորման նախագծի` սույն որոշման 1-ին կետում նշված տարածքները կհանդիսանան ճարտարապետական մեկ համալիր` պահպանելով տեղում գոյություն ունեցող պատմամշակութային հուշարձանները՝ առավել բարենպաստ պայմաններ ստեղծելով իրենց բնույթին համապատասխան` ժամանակակից օգտագործման համար, ինչպես նաեւ սույն որոշման 1-ին կետում նշված տարածքներում առկա բնակարանային ֆոնդի փոխարեն կանոնավոր կառուցապատմամբ, կորցված ու քանդված պատմության եւ մշակույթի հուշարձանների տեղափոխման եղանակով տարածքում քաղաքաշինական գեղագիտական միջավայրի ստեղծում, ինչպես նաեւ կառուցվող նոր փողոցը կդառնա այլընտրանքային երթեւեկության ճանապարհ, կառուցվող ստորգետնյա ավտոկայանատեղերը հնարավորություն կընձեռեն նվազեցնելու Երեւան քաղաքի կենտրոնում փողոցների ծանրաբեռնվածությունը»
Տարոն Մարգարյանը վարչապետին նաեւ կպատմի, որ իրացման ենթակա տարածքներում անհնար է ապահովել բնականոն երթեւեկություն, ջրամատակարարում, ջրահեռացում եւ քաղաքի համար կենսական նշանակություն ունեցող այլ պայմաններ, որոնք նախատեսված են Երեւան քաղաքի գլխավոր հատակագծով:
Սեփականության օտարման գործընթացն սկսելու վերջնական ժամկետը 2017 թվականի մարտի 1-ն է:
Նշենք, որ վերջին շրջանում հենց պատմամշակութային շենքերի քանդելու հետ կապված հասարակությունն իր վրդովմունքն է արտահայտում: Թե ինչպես է պահպանվում հին Երեւանի պատմաճարտարապետական միջավայրը կարդացեք այստեղ` 1. , 2. , 3
Լուսինե ԲՈՒԴԱՂՅԱՆ
