Այսօր ԱԺ նիստի սկզբում քվեարկության դրվեց երեկ քննարկված «Պետտուրքի մասին» օրենքում լրացումներ կատարելու մասին նախագիծը, որով նախատեսվում է օբսիդիանի հանքերի շահագործման լիցենզիայի պետտուրքը 10 մլն դրամից դարձնել 100 հազար դրամ:
Այդ նախագծի վերաբերյալ մի շարք առաջարկներ էր ներկայացրել ՀԱԿ խմբակցության պատգամավոր Հրանտ Բագրատյանը՝ ընդհուպ հորդորելով ռոյալթիով հաշվել արտոնագրի վճարը, ոչ թե ֆիքսված գնով:
Այսօր մինչ քվեարկությունը Հրանտ Բագրատյանը բորբոքվեց. «Ես ուզում եմ հարցնել՝ ի՞նչ իրավունքով եք սա քվեարկության դնում, սա տուրքի մասին չի: Սա տուրք չի: Երեկ ասում էինք, սկզբունքային բաներ էինք ասում: Էհ տենց ա՝ տենց ա, քվեարկեք, Մուշն ու Վանն էլ միացրեք Հայաստանին, թող պրծնի գնա, էլի: Քվեարկեք»,- ասաց Բագրատյանն ու հուսահատ թափահարեց ձեռքը:
ԱԺ տնտեսական մրցակցության հանձնաժողովի նախագահ Վարդան Այվազյանը պատասխանեց՝ օրենքը տուրքի մասին ա, դա պետք է դրվի քվեարկության:
Կարդացեք նաև
Նախագիծն ընդունվեց 79 կողմ, դեմ 11, ձեռնպահ 15 ձայների հարաբերակցությամբ:
Հռիփսիմե ՋԵԲԵՋՅԱՆ
