Հայաստանի մարզական պատվիրակությունն այսօր լուսադեմին է վերադարձել Լիլեհամերում ավարտված 2-րդ պատանեկան ձմեռային օլիմպիական խաղերից:
Նորվեգիայում մեր երկու ներկայացուցիչները կատարեցին իրենց առջեւ դրված առաջադրանքը: Եթե մենասահորդուհի Անաստասիա Գալուստյանը արդեն ավանդույթ դարձած անարդար մրցավարության, իսկ ազատ ծրագրում՝ վատառողջության պատճառով եզրափակեց լավագույն տասնյակը, դահուկասահորդ Միքայել Միքայելյանը երեք տարբեր մեկնարկներ ունեցավ: Դահուկավազքի կրոսում Միքայելը հաղթահարեց որակավորման արգելքը, սակայն այնուհետեւ եզրափակիչ չմտավ, 1400 մետր արագավազքում եզրագիծը հատեց 35-րդը՝ չհաղթահարելով որակավորման փուլը, իսկ 10 կմ ազատ ոճում պայքարն ավարտեց 26-րդ հորիզոնականում:
Հայաստանի դահուկային սպորտի ֆեդերացիայի գլխավոր քարտուղար Գագիկ Սարգսյանը Երեւան վերադառնալուց հետո Aravot.am-ի հետ զրույցում գոհունակություն հայտնեց Միքայել Միքայելյանի մրցելույթներից: «Միքայելի մասնակցությունը նորմալ էր: Նախ, նա առաջին անգամ մասնակցելով դահուկավազքի կրոսին, որը նոր մրցաձեւ էր նրա համար, իսկ նորվեգացիների համար՝ ազգային, հաճելիորեն զարմացրեց: Նա իրենից առաջ թողեց միայն դահուկային գերպետությունների՝ Նորվեգիա, Ռուսաստան, Շվեյցարիա եւ այլն, որոնց մեջ կային այնպիսիք, որոնք երկու մարզիկով էին հանդես գալիս: Մյուս երկու մեկնարկներում էլ Միքայելն արեց առավելագույնը», – ասաց Գ.Սարգսյանը:
Կարդացեք նաև
Հարցին, թե դահուկորդներն առաջիկայում ի՞նչ ծրագրեր ունեն, գլխավոր քարտուղարը պատասխանեց. «Կարելի է ասել, որ Լիլեհամերով ձմեռային մրցաշրջանը եզրափակվեց: Սակայն դահուկորդները մոտ օրերս մարզումներ եւ հավաքներ կանցկացնեն Աշոցքում՝ արդեն նախապատրաստվելով ամառային մրցաշրջանին»:
Աշոտ ՀԱԿՈԲՅԱՆ
Լուսանկարները՝ armnoc.am-ի
